حکومت کا سرکاری ملازمین اور پینشنرز کو بڑا ریلیف دینے کا فیصلہ

وفاقی حکومت نے کرسمس کے موقع پر مسیحی برادری سے تعلق رکھنے والے وفاقی ملازمین اور پنشنرز کو سہولت فراہم کرنے کا فیصلہ کیا ہے۔

  وزارت خزانہ کے حکام کے مطابق مسیحی برادری سے تعلق رکھنے والے وفاقی ملازمین کی دسمبر 2025 کی تنخواہیں مقررہ وقت سے پہلے ادا کی جائیں گی۔ اسی طرح مسیحی پنشنرز کو بھی دسمبر کی پنشن ایڈوانس دی جائے گی۔

حکام کا کہنا ہے کہ کرسمس کی خوشیوں کو مدنظر رکھتے ہوئے تنخواہیں اور پنشنز 22 دسمبر کو جاری کی جائیں گی۔ اس اقدام سے ملازمین اور پنشنرز کو مالی معاملات نمٹانے میں سہولت حاصل ہو گی۔

وزارت خزانہ نے اس حوالے سے کنٹرولر جنرل اکاؤنٹس اسلام آباد کو باقاعدہ ہدایات جاری کر دی ہیں۔ متعلقہ اداروں کو پیشگی ادائیگیوں کے تمام انتظامات بروقت مکمل کرنے کی ہدایت دی گئی ہے۔

یہ سہولت مسیحی برادری سے تعلق رکھنے والے تمام اہل وفاقی ملازمین اور پنشنرز کے لیے ہوگی۔ حکومت کا کہنا ہے کہ اقلیتوں کی فلاح و بہبود اور مذہبی آزادی کا تحفظ اس کی ترجیحات میں شامل ہے۔