سولر سسٹم استعمال کرنے والوں کیلئے بڑی خوشخبری آگئی

محکمہ بجلی سے وابستہ اداروں نے نیٹ میٹرنگ سے متعلق حالیہ خبروں پر وضاحت جاری کر دی ہے۔

 بجلی تقسیم کار کمپنیوں نے نیپرا کے نوٹس کے جواب میں مؤقف اختیار کیا ہے کہ نئی نیٹ میٹرنگ درخواستوں پر کوئی پابندی عائد نہیں کی گئی۔ صارفین سے صرف طریقہ کار تبدیل کرنے کو کہا گیا ہے۔

ڈسکوز کے ذرائع کے مطابق نیٹ میٹرنگ کی درخواستیں بدستور وصول کی جا رہی ہیں۔ تاہم اب مینوئل درخواستوں کے بجائے آن لائن پورٹل کے ذریعے اپلائی کرنے کی ہدایت دی گئی ہے۔ اس اقدام کا مقصد درخواست کے عمل کو آسان اور تیز بنانا ہے۔

ذرائع کا کہنا ہے کہ نئے صارفین پی آئی ٹی سی نیٹ میٹرنگ پورٹل پر جا کر اپنی درخواست جمع کروا رہے ہیں۔ آن لائن سسٹم کے ذریعے درخواست جمع ہوتے ہی صارف کو رجسٹریشن نمبر اور درخواست وصول ہونے کی تاریخ فوری طور پر فراہم کی جاتی ہے۔ اس سے صارفین کو شفاف اور بروقت معلومات مل رہی ہیں۔

بجلی کمپنیوں کے مطابق آن لائن پورٹل متعارف کروانے کا مقصد جدید ٹیکنالوجی کا استعمال، شفافیت کو فروغ دینا اور کرپشن کے امکانات کا خاتمہ ہے۔ حکام کا کہنا ہے کہ اس نظام سے نہ صرف صارفین کو سہولت ملے گی بلکہ درخواستوں کی نگرانی اور ریکارڈ رکھنا بھی آسان ہو جائے گا۔