وزیراعظم نے پراپرٹی فائلز کی خرید و فروخت کے جائزے کیلئے کمیٹی قائم کر دی

وزیراعظم شہباز شریف نے پراپرٹی فائلز کی خرید و فروخت کے جائزے کیلئے کمیٹی قائم کر دی ہے جو پلاٹس، ولاز اور اپارٹمنٹس کی فائلوں کی قانونی حیثیت کا جامع جائزہ لے گی۔

ذرائع کے مطابق فراڈ، ٹیکس چوری اور سرمایہ کاروں کے تحفظ کے خدشات کے پیش نظر کمیٹی تشکیل دی گئی، وزیر قانون کمیٹی کے سربراہ، چیئرمین ایف بی آر اور نیب کا نمائندہ کمیٹی میں شامل ہوں گے، تمام صوبوں کے سینئر ممبرز بورڈ آف ریونیو بھی کمیٹی کا حصہ ہوں گے۔

کمیٹی رئیل اسٹیٹ فائلوں کے موجودہ عملی طریقہ کار کا جائزہ لے گی، پراپرٹی فائلوں کے کاروبار کے ریونیو اثرات کا بھی تجزیہ کیا جائے گا، جعلی اور دوہری فائلوں، ایک جائیداد کی متعدد فروخت پر غور ہوگا۔

فائل ہولڈرز اور خریداروں کے حقوق کے تحفظ کیلئے سفارشات تیار کی جائیں گی، متعلقہ قوانین میں ترامیم کی تجاویز بھی کمیٹی کے مینڈیٹ میں شامل ہے۔ رئیل اسٹیٹ سیکٹر کو باقاعدہ قانونی فریم ورک میں لانا مینڈیٹ میں شامل ہے، کمیٹی کے ذریعے ٹیکسوں کی درست وصولی اور سرمایہ کاروں کو قانونی تحفظ فراہم کیا جائے گا۔