پیٹرولیم مصنوعات کی قیمتوں سے متعلق بُری خبر سامنے آگئی

عالمی منڈی میں پیٹرولیم مصنوعات کی قیمتوں میں معمولی اضافے کا امکان ظاہر کیا جا رہا ہے۔ اس کی بنیادی وجہ وینزویلا کی تازہ سیاسی صورتحال اور امریکی پابندیاں ہیں۔

 ذرائع کے مطابق وینزویلا پر امریکی حملے کے بعد ملک کے وسیع تیل کے ذخائر پر امریکہ باضابطہ کنٹرول حاصل کر رہا ہے۔ صدر ٹرمپ کے بیانات اس حوالے سے واضح اشارے دیتے ہیں۔

غیر ملکی خبر رساں اداروں کے مطابق امریکی کارروائی نے عالمی مالی منڈیوں میں جیو پولیٹیکل خطرات کو بڑھا دیا ہے۔ سرمایہ کار ایسے حالات میں عام طور پر محفوظ اثاثوں جیسے سونے میں سرمایہ کاری کرتے ہیں۔

 تجزیہ کاروں کا کہنا ہے کہ عالمی منڈی میں پیٹرولیم مصنوعات کی فراہمی کافی ہے، لیکن وینزویلا کی برآمدات میں رکاوٹ قیمتوں پر فوری اثر ڈال سکتی ہے۔

امریکی پابندیوں کے باعث وینزویلا کی تیل کی برآمدات جنوری سے مکمل طور پر بند ہیں۔ ریاستی آئل کمپنی پی ڈی وی ایس اے کو پیداوار میں کمی کرنی پڑ رہی ہے کیونکہ ملک میں ذخیرہ کرنے کی گنجائش تقریباً ختم ہو چکی ہے۔ لاکھوں بیرل تیل ٹینکروں اور ذخیرہ گاہوں میں پھنس چکا ہے۔

ماہرین کا کہنا ہے کہ امریکی حملے سے وینزویلا کے پیداواری اور ریفائننگ نظام کو براہِ راست نقصان نہیں پہنچا، لیکن پابندیوں کے سبب دسمبر میں برآمدات نصف ہو کر تقریباً پانچ لاکھ بیرل یومیہ رہ گئی تھیں۔ جنوری سے امریکی کمپنی شیوران کو محدود مقدار میں ایک لاکھ بیرل یومیہ برآمد کی اجازت حاصل ہے۔

اوپیک اور اس کے اتحادی ممالک (اوپیک پلس) نے پہلی سہ ماہی میں تیل کی پیداوار موجودہ سطح پر برقرار رکھنے کا فیصلہ کیا ہے۔ ماہرین کے مطابق یہ اقدام عالمی منڈی میں موجود غیر یقینی صورتحال کے پیشِ نظر احتیاطی ہے۔

توانائی کے ماہرین کہتے ہیں کہ وینزویلا اور ایران سے جغرافیائی سیاسی خطرات کی وجہ سے تیل کی قیمتوں پر دباؤ بڑھ سکتا ہے، مگر دیگر ممالک کی اضافی پیداوار اس اثر کو کم کر سکتی ہے۔ کیپیٹل اکنامکس کے مطابق وینزویلا میں قلیل مدتی رکاوٹ کو دیگر خطوں کی پیداوار آسانی سے پورا کر سکتی ہے۔

دوسری جانب امریکی صدر ٹرمپ نے ایران کے حوالے سے بھی سخت موقف اپنایا ہے اور ممکنہ مداخلت کا عندیہ دیا ہے، جس سے مشرق وسطیٰ میں کشیدگی بڑھنے کا خدشہ ہے۔ تجزیہ کاروں کا کہنا ہے کہ امریکا وینزویلا میں تیل کی پیداوار کو بحال کرنے کے لیے سرمایہ کاری کرے گا، مگر ملک میں بدانتظامی کی وجہ سے فوری اضافہ ممکن نہیں۔

عمومی طور پر ماہرین کا کہنا ہے کہ سیاسی کشیدگی کے باعث تیل کی قیمتوں میں محدود اضافہ ہو سکتا ہے، لیکن عالمی منڈی میں وافر سپلائی کی وجہ سے بڑے اتار چڑھاؤ کا امکان کم ہے۔