سونے کی قیمت میں اچانک تاریخی اضافہ ہوگیا؛ فی تولہ کتنے کا ہوگیا؟

پاکستان کی مقامی صرافہ مارکیٹس میں سونے کی قیمت میں ایک ہی دن میں نمایاں اضافہ ریکارڈ کیا گیا ہے، جس کے بعد سونا ملکی تاریخ کی بلند ترین سطح پر پہنچ گیا ہے۔

آل پاکستان صرافہ جیمز اینڈ جیولرز ایسوسی ایشن کے مطابق جمعہ کے روز فی تولہ سونے کی قیمت میں 9 ہزار 200 روپے اضافہ ہوا، جس کے بعد 24 کیرٹ فی تولہ سونا 4 لاکھ 64 ہزار 762 روپے میں فروخت ہوتا رہا۔

اسی طرح دس گرام سونے کی قیمت 7 ہزار 888 روپے بڑھ کر 3 لاکھ 98 ہزار 458 روپے ہو گئی ہے۔

چاندی کی قیمت میں بھی اضافہ دیکھا گیا ہے۔ مقامی مارکیٹ میں فی تولہ چاندی 267 روپے مہنگی ہو کر 8 ہزار 23 روپے تک پہنچ گئی۔

دوسری جانب عالمی منڈی میں بھی سونے کی قیمت میں اضافہ ریکارڈ کیا گیا ہے۔ عالمی سطح پر فی اونس سونا 92 ڈالر کے اضافے کے بعد 4 ہزار 424 ڈالر پر آ گیا ہے۔