تنخواہ دار طبقے سے متعلق بڑی خبر آگئی

فیڈرل بورڈ آف ریونیو (ایف بی آر) کی تازہ رپورٹ کے مطابق تنخواہ دار طبقہ ملک میں براہِ راست ٹیکس بوجھ کا سب سے بڑا حصہ برداشت کر رہا ہے۔

 رپورٹ کے مطابق رواں مالی سال کے ابتدائی چھ ماہ میں تنخواہ دار افراد نے مجموعی طور پر 266 ارب روپے انکم ٹیکس کی مد میں ادا کیے، جو پچھلے سال کی اسی مدت کے مقابلے میں 23 ارب روپے زیادہ ہیں۔

ایف بی آر کے اعداد و شمار کے مطابق تنخواہ دار افراد کو اپنی کل آمدنی کا تقریباً 38 فیصد براہِ راست ٹیکس کی شکل میں ادا کرنا پڑتا ہے۔ حکام کا کہنا ہے کہ مہنگائی اور بڑھتے ہوئے اخراجات کے باوجود تنخواہوں سے ٹیکس کی کٹوتی بغیر رکاوٹ جاری ہے۔

نان کارپوریٹ تنخواہ دار ملازمین نے چھ ماہ کے دوران 117 ارب روپے ٹیکس ادا کیے، جو گزشتہ سال کے مقابلے میں 14 فیصد زیادہ ہے۔ اس دوران انہوں نے 23 ارب روپے اضافی ٹیکس جمع کروایا۔ کارپوریٹ شعبے کے ملازمین نے اسی مدت میں 82 ارب روپے ٹیکس ادا کیے، جو پچھلے سال کے مقابلے میں 13 فیصد زیادہ ہے۔

ریئل اسٹیٹ سیکٹر میں بھی ٹیکس وصولی میں بہتری دیکھی گئی۔ چھ ماہ کے دوران ودہولڈنگ ٹیکس کی مد میں 126 ارب روپے جمع کیے گئے، جس میں پلاٹس کی فروخت پر 66 فیصد اضافہ ہوا اور ودہولڈنگ ٹیکس 87 ارب روپے تک پہنچ گیا۔ پلاٹس کی خریداری پر ودہولڈنگ ٹیکس میں بھی 29 فیصد اضافہ ریکارڈ کیا گیا، جو 39 ارب روپے تک پہنچا۔

صوبائی حکومت کے ملازمین کی جانب سے ادا کیے گئے انکم ٹیکس میں گزشتہ سال کے مقابلے میں 39 ارب روپے کی کمی ریکارڈ کی گئی، تاہم وفاقی حکومت کے ملازمین سے وصولیوں میں 8 فیصد اضافہ ہوا اور یہ 27 ارب روپے تک پہنچ گئی۔

ایف بی آر کے مطابق جولائی سے دسمبر 2025 تک مجموعی انکم ٹیکس کی وصولی 3,000 ارب روپے سے تجاوز کر گئی، مگر تاجروں اور امیر طبقے سے ٹیکس کی وصولی میں بہتری نہیں آئی۔ رپورٹ میں بتایا گیا ہے کہ صرف تنخواہ دار طبقے نے ملک بھر میں جمع ہونے والے کل انکم ٹیکس کا تقریباً 10 فیصد حصہ فراہم کیا۔ گزشتہ مالی سال میں تنخواہ دار طبقے نے 555 ارب روپے ٹیکس ادا کیے تھے۔