مہنگائی سے پریشان صارفین کیلئے بُری خبر؛ آٹے کی قیمت کو اچانک پر لگ گئے

ملک بھر میں آٹے کی قیمتوں میں مسلسل اضافہ عوام کے لیے نئی پریشانی بن گیا ہے۔

روزمرہ کی بنیادی ضرورت ہونے کے باوجود آٹا عام آدمی کی پہنچ سے دور ہوتا جا رہا ہے۔ حالیہ دنوں میں مختلف شہروں میں قیمتوں میں تیز رفتار اضافہ دیکھنے میں آیا ہے، جس سے مہنگائی کے دباؤ میں مزید اضافہ ہوا ہے۔

سرکاری اعداد و شمار کے مطابق صرف ایک ہفتے کے دوران 20 کلو آٹے کے تھیلے کی قیمت میں نمایاں فرق ریکارڈ کیا گیا۔ کچھ شہروں میں اضافہ محدود رہا، جبکہ بعض مقامات پر قیمتیں اچانک بہت زیادہ بڑھ گئیں۔ اس صورتحال نے صارفین کو شدید مالی مشکلات سے دوچار کر دیا ہے۔

اعداد و شمار کے مطابق وفاقی دارالحکومت اسلام آباد میں آٹے کی قیمت ملک میں سب سے زیادہ سطح پر پہنچ گئی ہے۔ یہاں 20 کلو کا تھیلا تقریباً 2 ہزار 900 روپے کے قریب فروخت ہو رہا ہے۔ راولپنڈی میں بھی قیمتیں اسی سطح کے آس پاس ہیں، جس سے جڑواں شہروں کے رہائشی خاص طور پر متاثر ہو رہے ہیں۔

دیگر شہروں میں بھی صورتحال مختلف نہیں۔ سرگودھا میں ایک ہفتے کے اندر آٹے کی قیمت میں سب سے زیادہ اضافہ ریکارڈ کیا گیا۔ ملتان، خضدار، بہاولپور اور کوئٹہ میں بھی قیمتوں میں واضح اضافہ سامنے آیا ہے۔ اسی طرح کراچی، پشاور، سکھر اور لاڑکانہ میں بھی آٹے کے تھیلے کی قیمت میں سو روپے تک اضافہ دیکھا گیا۔

لاہور، سیالکوٹ، حیدرآباد اور بنوں جیسے شہروں میں اگرچہ اضافہ نسبتاً کم رہا، لیکن مجموعی طور پر قیمتیں اب بھی عام صارف کی قوتِ خرید سے زیادہ ہیں۔ مختلف علاقوں میں قیمتوں کا فرق شہریوں کے لیے مزید الجھن کا باعث بن رہا ہے۔

آٹے کی بڑھتی ہوئی قیمتوں نے پہلے سے مہنگائی کے بوجھ تلے دبے عوام کی مشکلات میں اضافہ کر دیا ہے۔ شہریوں کا کہنا ہے کہ اگر فوری اقدامات نہ کیے گئے تو غریب اور متوسط طبقے کے لیے دو وقت کی روٹی کا حصول بھی مشکل ہو جائے گا۔