ملک بھر کے بجلی صارفین کیلئے یکساں ٹیرف نافذ کرنے کا فیصلہ

نیپرا نے وفاقی حکومت کی درخواست پر ملک بھر کے بجلی صارفین کیلئے یکساں ٹیرف نافذ کرنے کا فیصلہ جاری کر دیا ہے۔

نیپرا کے مطابق کے الیکٹرک اور تمام ڈسکوز کیلئے بجلی کا یکساں ٹیرف نافذ ہوگا جبکہ ملک بھر کے صارفین کیلئے بنیادی ٹیرف برقرار رہے گا۔

نیپرا کے مطابق گھریلو صارفین کیلئے بجلی کا زیادہ سے زیادہ ٹیرف 47.69 روپے فی یونٹ برقرار رہے گا۔ ایک سے 100 یونٹ تک پروٹیکٹڈ صارفین کا ٹیرف 10.54 روپے فی یونٹ برقرار رکھا گیا ہے جبکہ 101 سے 200 یونٹ تک پروٹیکٹڈ صارفین کا ٹیرف 13.01 روپے فی یونٹ برقرار رکھنے کی تجویز دی گئی ہے۔

نان پروٹیکٹڈ گھریلو صارفین کیلئے ایک سے 100 یونٹ تک بجلی کا ٹیرف 22.44 روپے فی یونٹ برقرار رہے گا۔ ماہانہ 101 سے 200 یونٹ تک ٹیرف 28.91 روپے فی یونٹ، 201 سے 300 یونٹ تک 33.10 روپے، 301 سے 400 یونٹ تک 37.99 روپے، 401 سے 500 یونٹ تک 40.22 روپے، 501 سے 600 یونٹ تک 41.62 روپے اور 601 سے 700 یونٹ تک 42.76 روپے فی یونٹ برقرار رہے گا۔ ماہانہ 700 یونٹ سے زائد استعمال پر بجلی کا ٹیرف 47.69 روپے فی یونٹ برقرار رکھا گیا ہے۔

لائف لائن گھریلو صارفین کیلئے ماہانہ 50 یونٹ تک بجلی کا ٹیرف 3.95 روپے فی یونٹ جبکہ 51 سے 100 یونٹ تک 7.74 روپے فی یونٹ برقرار رہے گا۔

نیپرا کے مطابق ادارے نے سال 2026 کیلئے بجلی کے بنیادی ٹیرف میں کمی کی منظوری دی تھی اور بنیادی ٹیرف میں 62 پیسے فی یونٹ کمی منظور کی گئی تھی۔ نیپرا نے یکساں ٹیرف کی درخواست سے متعلق اپنا فیصلہ وفاقی حکومت کو بھجوا دیا تھا۔