نئے کرنسی نوٹوں سے متعلق اہم پیشرفت سامنے آگئی

وفاقی حکومت نے نئے 100، 500، 1000 اور 5000 روپے کے بینک نوٹ متعارف کروانے کے معاملے پر اہم قدم اٹھا لیا ہے۔ اس سلسلے میں وفاقی کابینہ کی جانب سے قائم کمیٹی کو سفارشات تیار کرنے کی ذمہ داری سونپ دی گئی ہے۔

ذرائع کے مطابق کمیٹی کو خاص طور پر یہ جانچنے کی ہدایت دی گئی ہے کہ نئے کرنسی نوٹوں کی تیاری میں استعمال ہونے والا مواد انسانی صحت کے لیے محفوظ ہے یا نہیں۔ حکومت چاہتی ہے کہ نئے نوٹ نہ صرف مضبوط ہوں بلکہ عوام کے لیے کسی قسم کے طبی یا ماحولیاتی نقصان کا باعث بھی نہ بنیں۔

کمیٹی نئے نوٹوں کے کاغذ، رنگ، کیمیکل اور مجموعی معیار کا تفصیلی جائزہ لے گی۔ اس کے ساتھ ساتھ یہ بھی دیکھا جائے گا کہ آیا یہ مواد طویل عرصے تک استعمال کے قابل ہے یا نہیں۔

ذرائع کا کہنا ہے کہ وفاقی کابینہ نے واضح ہدایات دی ہیں کہ کرنسی نوٹوں کی تیاری میں کسی بھی قسم کا غیر معیاری یا نقصان دہ مواد استعمال نہ کیا جائے۔ عوامی صحت اور حفاظت کو اس فیصلے میں ترجیح دی جا رہی ہے۔

کابینہ کمیٹی اپنی رپورٹ مکمل کرنے کے بعد سفارشات وفاقی حکومت کو پیش کرے گی، جس کی روشنی میں نئے بینک نوٹ جاری کرنے یا نہ کرنے کا حتمی فیصلہ کیا جائے گا۔