پیٹرولیم مصنوعات سے متعلق اہم خبر آگئی

ملک میں پیٹرولیم مصنوعات کی اسمگلنگ کے خلاف کسٹمز انفورسمنٹ کی کارروائیاں مسلسل جاری ہیں۔

 حکام کے مطابق ان کارروائیوں کے دوران اب تک ملک بھر میں ایک ہزار چار سو بیالیس غیر قانونی پیٹرول پمپ سیل کیے جا چکے ہیں۔ مختلف علاقوں میں چھاپوں کے دوران یہ بات سامنے آئی کہ کم از کم 134 پمپ بغیر اجازت پیٹرول اور دیگر مصنوعات فروخت کر رہے تھے، جن کے خلاف فوری کارروائی کی گئی۔

دستاویزات کے مطابق اسمگلنگ کے خلاف کریک ڈاؤن کے مثبت نتائج سامنے آئے ہیں اور اس سے پیٹرولیم ڈویلپمنٹ لیوی کی وصولی میں نمایاں اضافہ ہوا ہے۔ موجودہ مالی سال کے پہلے چھ ماہ میں لیوی کی مد میں 828 ارب روپے جمع کیے گئے، جو مقررہ ہدف سے 94 ارب روپے زیادہ ہیں۔ یہ اضافہ گزشتہ مالی سال کے اسی عرصے کے مقابلے میں بھی نمایاں ہے۔

رپورٹ کے مطابق جولائی سے نومبر کے دوران پیٹرولیم لیوی کی مد میں مجموعی طور پر 706 ارب روپے وصول ہوئے۔ ان میں سے 146 ارب روپے قانونی طور پر فروخت ہونے والے ایندھن سے حاصل ہوئے جبکہ 138 ارب روپے قیمتوں میں اضافے کی وجہ سے جمع ہوئے۔ حکام کا کہنا ہے کہ اسمگلنگ کے خلاف سخت نگرانی اور چیکنگ کے باعث ریونیو میں بہتری آئی ہے۔

چاروں صوبوں میں جاری کارروائیوں کے نتیجے میں غیر قانونی پیٹرول کی فروخت میں واضح کمی دیکھی گئی ہے۔ کسٹمز حکام کے مطابق یہ مہم آئندہ بھی جاری رہے گی تاکہ ملکی معیشت کو نقصان پہنچانے والے عناصر کا مکمل خاتمہ کیا جا سکے اور قانونی کاروبار کو فروغ دیا جا سکے۔