پیٹرولیم مصنوعات کی قیمتوں میں بڑے اضافے کا امکان

ملک بھر میں پیٹرولیم مصنوعات کی قیمتوں میں ایک بار پھر اضافے کا امکان ظاہر کیا جا رہا ہے۔

خلیجی خطے میں بڑھتی ہوئی کشیدگی اور امریکا و ایران کے درمیان تناؤ کے باعث عالمی منڈی میں تیل کی قیمتیں متاثر ہو رہی ہیں، جس کا اثر پاکستان میں بھی نظر آ سکتا ہے۔

 ذرائع کے مطابق یکم فروری 2026 سے آئندہ پندرہ روز کے لیے پیٹرولیم مصنوعات کی قیمتوں میں نمایاں اضافہ متوقع ہے۔

حکام کی جانب سے تیار کردہ ابتدائی تخمینوں کے مطابق ہائی اسپیڈ ڈیزل کی قیمت میں فی لیٹر 9 روپے 47 پیسے تک اضافہ ہو سکتا ہے۔ اس کے علاوہ مٹی کے تیل کی قیمت میں 3 روپے 69 پیسے جبکہ لائٹ ڈیزل آئل کی قیمت میں 6 روپے 95 پیسے فی لیٹر اضافے کا امکان ظاہر کیا جا رہا ہے۔

ذرائع کا کہنا ہے کہ عالمی مارکیٹ میں خام تیل مہنگا ہونے اور خطے میں غیر یقینی صورتحال کے باعث یہ اضافہ ناگزیر ہو گیا ہے۔

 اگر قیمتوں میں یہ اضافہ نافذ ہو جاتا ہے تو اس کا براہِ راست اثر ٹرانسپورٹ اور اشیائے ضروریہ کی قیمتوں پر پڑ سکتا ہے، جس سے عوام کی مشکلات میں مزید اضافہ ہونے کا خدشہ ہے۔ حتمی فیصلہ حکومت کی جانب سے مشاورت کے بعد کیا جائے گا۔