سیمنٹ سے متعلق بڑی خبر آگئی

جاری مالی سال کے ابتدائی سات ماہ کے دوران ملک میں سیمنٹ کی فروخت میں واضح اضافہ دیکھا گیا ہے۔

اعداد و شمار کے مطابق مجموعی فروخت میں سالانہ بنیاد پر 9 فیصد اضافہ ریکارڈ کیا گیا ہے۔ اسی طرح سیمنٹ کی برآمدات میں بھی معمولی بہتری سامنے آئی ہے۔

آل پاکستان سیمنٹ مینوفیکچررز ایسوسی ایشن کے مطابق مالی سال کے پہلے سات ماہ میں ملک بھر میں 29.94 ملین ٹن سیمنٹ فروخت ہوئی۔ یہ مقدار گزشتہ مالی سال کی اسی مدت کے مقابلے میں زیادہ ہے۔ پچھلے سال کے پہلے سات ماہ میں سیمنٹ کی فروخت 27.54 ملین ٹن رہی تھی۔

جنوری کے مہینے میں بھی سیمنٹ کی فروخت میں اضافہ ریکارڈ کیا گیا۔ دستیاب اعداد و شمار کے مطابق جنوری میں 4.15 ملین ٹن سیمنٹ فروخت ہوا۔ یہ فروخت گزشتہ سال جنوری کے مقابلے میں 3 فیصد زیادہ ہے، جب فروخت 4.03 ملین ٹن رہی تھی۔

رپورٹ کے مطابق شمالی علاقوں میں سیمنٹ کی طلب میں خاصا اضافہ دیکھا گیا ہے۔ مالی سال کے پہلے سات ماہ میں شمالی شہروں اور علاقوں میں 20.66 ملین ٹن سیمنٹ فروخت ہوئی۔ یہ فروخت گزشتہ مالی سال کی اسی مدت کے مقابلے میں 12 فیصد زیادہ ہے۔ اس سے قبل شمالی علاقوں میں 18.38 ملین ٹن سیمنٹ فروخت ہوئی تھی۔

دوسری جانب جنوبی علاقوں میں فروخت میں معمولی اضافہ ریکارڈ کیا گیا ہے۔ پہلے سات ماہ کے دوران جنوبی شہروں میں 3.82 ملین ٹن سیمنٹ فروخت ہوئی۔ یہ مقدار گزشتہ سال کی اسی مدت کے 3.77 ملین ٹن کے مقابلے میں ایک فیصد زیادہ ہے۔

سیمنٹ کی برآمدات کے حوالے سے بھی مثبت رجحان سامنے آیا ہے۔ مالی سال کے پہلے سات ماہ میں 5.46 ملین ٹن سیمنٹ برآمد کی گئی۔ گزشتہ مالی سال کی اسی مدت میں برآمدات کا حجم 5.39 ملین ٹن تھا۔ اس طرح مجموعی طور پر ایک فیصد اضافہ ریکارڈ ہوا۔

جنوری کے مہینے میں برآمدات میں نمایاں بہتری دیکھنے میں آئی۔ اس دوران 0.83 ملین ٹن سیمنٹ برآمد ہونے کا اندازہ لگایا گیا ہے۔ یہ برآمدات گزشتہ سال جنوری کے مقابلے میں 43 فیصد زیادہ ہیں، جب برآمدات 0.58 ملین ٹن تھیں۔