سولر صارفین کیلئے اہم خبر؛ نیٹ میٹرنگ سے متعلق بڑا فیصلہ سامنے آگیا

وفاقی وزیر توانائی اویس لغاری نے نیٹ میٹرنگ سے متعلق جمع شدہ درخواستوں پر اہم ہدایات جاری کر دی ہیں۔

 وفاقی وزیر توانائی اویس لغاری نے واضح کیا ہے کہ 8 فروری تک جمع ہونے والی تمام درخواستوں کو پرانے قواعد کے تحت ہی نمٹایا جائے گا۔ اس فیصلے سے صارفین اور کمپنیوں میں پھیلی بے یقینی کافی حد تک ختم ہو گئی ہے۔ کئی درخواست گزار نئے قواعد کے خدشات کے باعث پریشان تھے، مگر اب انہیں پرانے طریقہ کار کے مطابق سہولت ملے گی۔

وفاقی وزیر نے بجلی کی تقسیم کار کمپنیوں کو ہدایت دی ہے کہ درخواستوں کی جانچ پڑتال میں شفافیت کو یقینی بنایا جائے۔ انہوں نے کہا کہ کسی بھی درخواست کے ساتھ تاخیر یا غیر ضروری رکاوٹ برداشت نہیں کی جائے گی۔ تمام کمپنیوں کو حکم دیا گیا ہے کہ وہ فوری طور پر پراسس تیز کریں اور صارفین کو بروقت آگاہ رکھیں۔

محکمہ توانائی کے مطابق 8 فروری تک ملک بھر کی تقسیم کار کمپنیوں کے پاس نیٹ میٹرنگ کی 5 ہزار 165 درخواستیں موجود ہیں۔ ان درخواستوں کے ذریعے تقریباً 250 میگاواٹ بجلی نیشنل گرڈ میں شامل ہوگی۔