مستحقین افراد حکومت سے نگہبان کارڈ کے ذریعے 10 ہزار روپے کس طرح حاصل کرسکتے ہیں؟ جانیے

لاہور میں رمضان نگہبان کارڈ کے ذریعے مستحق خاندانوں کو مالی مدد فراہم کرنے کا عمل تیزی سے جاری ہے۔

 ضلعی انتظامیہ کی ٹیمیں روزانہ مختلف علاقوں میں جا رہی ہیں۔ اہل افراد کے گھروں پر خود جا کر کارڈز دیے جا رہے ہیں۔ اس کارڈ کے ذریعے ہر مستحق فرد کو دس ہزار روپے تک کی امداد مل رہی ہے۔ مقصد یہ ہے کہ رمضان کے دوران غریب خاندانوں کو ضروری اخراجات میں سہولت مل سکے۔

ڈپٹی کمشنر کی ہدایت پر تمام ٹیموں کو واضح ٹاسک دیا گیا ہے۔ عمل مکمل طور پر شفاف رکھا جا رہا ہے۔ انتظامیہ کا کہنا ہے کہ کسی کو بھی مستحقین سے غلط فائدہ اٹھانے کی اجازت نہیں دی جائے گی۔ اگر کسی علاقے میں شکایت موصول ہوئی تو فوری کارروائی کی جائے گی۔ شہریوں سے کہا گیا ہے کہ کسی بھی مسئلے کی صورت میں متعلقہ حکام سے رابطہ کریں۔

حکام کے مطابق اب تک لاہور میں اکسٹھ ہزار سے زائد رمضان نگہبان کارڈ مستحق خاندانوں تک پہنچائے جا چکے ہیں۔ کئی علاقوں میں فہرستوں کی جانچ مکمل ہو گئی ہے۔ باقی علاقوں میں بھی جلد تقسیم مکمل کرنے کا ہدف رکھا گیا ہے۔ انتظامیہ نے کہا ہے کہ رمضان سے پہلے زیادہ سے زیادہ خاندانوں تک امداد پہنچائی جائے گی تاکہ لوگوں کو مہنگائی کے دباؤ سے کچھ ریلیف مل سکے۔