ملک بھر میں پیٹرولیم مصنوعات کی بلا تعطل فراہمی حکومت کی اولین ترجیح ہے، وزیر خزانہ

وفاقی وزیر خزانہ محمد اورنگزیب کا کہنا ہے کہ ملک بھر میں پیٹرولیم مصنوعات کی بلا تعطل فراہمی حکومت کی اولین ترجیح ہے۔

وزیر خزانہ کی زیر صدارت پیٹرولیم مصنوعات کی قیمتوں سے متعلق مانیٹرنگ کمیٹی کا ایک اہم اجلاس ہوا۔ جس میں توانائی کی صورتحال اور عالمی منڈی کے حالات کا تفصیلی جائزہ لیا گیا۔

 حکام نے بریفنگ دیتے ہوئے بتایا کہ ملک میں پیٹرول اور ڈیزل کے ذخائر تسلی بخش سطح پر موجود ہیں اور سپلائی کا نظام مستحکم ہے۔ مارچ اور اپریل کے دوران پیٹرول لے کر آنے والے جہازوں کا شیڈول طے کر لیا گیا ہے۔ اس سے آئندہ ہفتوں میں ایندھن کی فراہمی میں تسلسل برقرار رہے گا۔

محمد اورنگزیب نے ہدایت کی کہ ملکی ریفائنریاں اپنی مکمل استعداد کے ساتھ کام جاری رکھیں تاکہ پیٹرولیم مصنوعات کی پیداوار میں کوئی کمی نہ آئے۔ حکومت عالمی سطح پر تیل کی قیمتوں میں اتار چڑھاؤ اور جغرافیائی صورتحال پر مسلسل نظر رکھے ہوئے ہے۔

انہوں نے کہا کہ مقامی اور عالمی قیمتوں کے فرق کا بھی باریک بینی سے جائزہ لیا جا رہا ہے تاکہ عوام کو زیادہ سے زیادہ ریلیف دیا جا سکے۔ وزیر خزانہ نے تمام متعلقہ اداروں کو ہدایت کی کہ وہ باہمی تعاون سے کام کریں اور ملک بھر میں ایندھن کی بلا تعطل فراہمی کو یقینی بنائیں۔