کسان، مزدور اور چھوٹے کاروباری افراد کیلئے بڑی خوشخبری

سیکیورٹیز اینڈ ایکسچینج کمیشن آف پاکستان Securities and Exchange Commission of Pakistan نے پنجاب کی پہلی صوبائی لائف انشورنس کمپنی کو باقاعدہ لائسنس جاری کر دیا ہے۔ اس پیشرفت کے بعد صوبے میں انشورنس کے شعبے میں ایک نیا باب کھل گیا ہے۔

سرکاری ذرائع کے مطابق Punjab Life Insurance Company نے اپنا بزنس پلان بھی متعلقہ ادارے کو جمع کروا دیا ہے۔ اس منصوبے میں کم آمدنی والے طبقے کو بنیادی انشورنس سہولیات فراہم کرنے پر زور دیا گیا ہے۔ اس میں کسان، مزدور اور چھوٹے کاروبار کرنے والے افراد کو ترجیح دی جائے گی تاکہ وہ بھی مالی تحفظ حاصل کر سکیں۔

حکام کا کہنا ہے کہ یہ کمپنی نہ صرف لائف انشورنس فراہم کرے گی بلکہ صوبے میں جاری سوشل ہیلتھ انشورنس پروگرامز کو بھی بہتر انداز میں منظم کرے گی۔ اس کے ساتھ ساتھ جدید ٹیکنالوجی کو مدنظر رکھتے ہوئے ڈیجیٹل انشورنس مصنوعات متعارف کروانے کا بھی منصوبہ ہے، تاکہ شہری آسانی سے اپنے موبائل کے ذریعے انشورنس حاصل کر سکیں۔

ماہرین کے مطابق اس اقدام سے ان افراد کو فائدہ پہنچے گا جو پہلے انشورنس سہولت سے محروم تھے۔ خاص طور پر دیہی علاقوں میں رہنے والے افراد کے لیے یہ ایک اہم موقع ہوگا کہ وہ اپنی اور اپنے خاندان کی مالی حفاظت یقینی بنا سکیں۔ اس سے نہ صرف انفرادی سطح پر تحفظ بڑھے گا بلکہ معیشت پر بھی مثبت اثرات مرتب ہوں گے۔

 واضح رہے کہ لائسنس کے اجراء کے بعد ملک میں لائف انشورنس کمپنیوں کی مجموعی تعداد 13 ہو گئی ہے۔