ایران جنگ؛ تیل کی قیمتیں کہاں تک جائیں گی؟ پریشان کن خبر آگئی

عالمی تیل مارکیٹ میں شدید ہلچل پیدا ہو گئی ہے۔ آبنائے ہرمز کی صورتحال نے دنیا بھر میں تشویش بڑھا دی ہے۔

ماہرین کے مطابق اگر حالات مزید خراب ہوئے تو تیل کی قیمت 200 ڈالر فی بیرل تک پہنچ سکتی ہے، جو عالمی معیشت کے لیے بڑا خطرہ ثابت ہو سکتا ہے۔

بین الاقوامی رپورٹس کے مطابق دنیا ابھی تک اس بحران کی شدت کو مکمل طور پر نہیں سمجھ سکی۔ امریکی حکام اور مالیاتی ماہرین اس صورتحال کا بغور جائزہ لے رہے ہیں۔ اگر سپلائی میں رکاوٹ برقرار رہی تو توانائی بحران مزید سنگین ہو سکتا ہے۔

ماہرین نے خبردار کیا ہے کہ یہ صورتحال 1970 کی دہائی کے تیل بحران جیسی شکل اختیار کر سکتی ہے۔ آبنائے ہرمز بند ہونے سے ایشیائی ممالک میں ایندھن کی قلت پیدا ہو سکتی ہے، جو بعد میں یورپ اور دیگر خطوں تک پھیل سکتی ہے۔ خاص طور پر یورپ کو ڈیزل کی کمی کا سامنا ہو سکتا ہے۔

اعداد و شمار کے مطابق اس اہم گزرگاہ میں رکاوٹ کے باعث عالمی تیل سپلائی میں تقریباً 11.1 ملین بیرل یومیہ کمی کا خدشہ ہے۔

 دوسری جانب سعودی عرب اور متحدہ عرب امارات متبادل راستوں کے ذریعے سپلائی کو برقرار رکھنے کی کوشش کر رہے ہیں، اور تقریباً 10.9 ملین بیرل یومیہ تیل کی ترسیل کو سنبھالنے کی کوشش کی جا رہی ہے۔