صدر ٹرمپ کے خطاب کے بعد عالمی منڈی میں تیل کی قیمتوں میں چار فیصد اضافہ

صدر ٹرمپ کے خطاب کے فوراً بعد عالمی منڈیوں میں بے یقینی کی لہر دوڑ گئی ہے، جہاں تیل کی قیمتوں میں تیزی سے اضافہ ہوا ہے، وہیں اسٹاک مارکیٹیں مندی کا شکار ہو گئی ہیں۔

امریکی صدر ڈونلڈ ٹرمپ کے خطاب نے عالمی تیل کی منڈیوں کو مطمئن کرنے کے بجائے تشویش میں مبتلا کر دیا ہے، جس کے نتیجے میں تیل کی قیمتوں میں فوری طور پر اضافہ دیکھا گیا ہے۔

صدر کے خطاب سے قبل برینٹ خام تیل سو ڈالر فی بیرل کے قریب تھا، لیکن خطاب کے دوران اور اس کے فوراً بعد قیمتوں میں چار فیصد اضافہ ہوا اور یہ ایک سو پانچ ڈالر اڑتیس سینٹس تک پہنچ گئی۔

آبنائے ہرمز، جو دنیا کی بیس فیصد توانائی کی نقل و حمل کا اہم ترین راستہ ہے، اٹھائیس فروری سے فوجی تنازعے کے باعث عملی طور پر بند ہے، جس نے عالمی سپلائی چین کو بری طرح متاثر کیا ہے۔

یہ بھی پڑھیں : ٹرمپ کی تقریر یا سوشل میڈیا پوسٹس کا مجموعہ؟ مبصرین نے خطاب کو تضادات کا شاہکار قرار دے دیا

تیل کی بڑھتی ہوئی قیمتوں کے ساتھ ساتھ ایشیائی اسٹاک مارکیٹوں میں بھی شدید مندی دیکھی جا رہی ہے۔ جاپان کا نکی انڈیکس ڈیڑھ فیصد، جنوبی کوریا کا کوسپی ڈھائی فیصد سے زیادہ اور ہانگ کانگ کا ہینگ سینگ انڈیکس ایک فیصد تک گر گیا ہے۔

ایشیائی ممالک اپنی توانائی کی ضروریات کے لیے مشرق وسطیٰ پر بہت زیادہ انحصار کرتے ہیں، اسی لیے اس تنازعے کا سب سے زیادہ اثر اسی خطے کی معیشت پر پڑ رہا ہے۔

دوسری جانب، امریکہ کی وال اسٹریٹ میں بھی صورتحال حوصلہ افزا نہیں ہے، جہاں ڈاؤ جونز اور ایس اینڈ پی پانچ سو کے فیوچرز میں نمایاں گراوٹ دیکھی جا رہی ہے، جو سرمایہ کاروں کے عدم اعتماد اور خوف کی عکاسی کر رہی ہے۔