پاکستان نے 1.43 ارب ڈالر کے انٹرنیشنل بانڈ کی ادائیگی کر دی

کراچی: اسٹیٹ بینک آف پاکستان نے انٹرنیشنل بانڈ کی ادائیگی کی تصدیق کر دی ہے۔ حکام کے مطابق پاکستان نے مجموعی طور پر 1.43 ارب ڈالر کی بیرونی ادائیگیاں مکمل کر لی ہیں۔

اسٹیٹ بینک کے مطابق یہ ادائیگیاں 7 اپریل کو کی گئیں۔ یہ رقم بین الاقوامی بانڈ کی مد میں ادا کی گئی، جو ملک پر واجب الادا تھی۔

ادائیگیوں کی تفصیلات کے مطابق ایک ارب 30 کروڑ ڈالر اصل زر کی مد میں ادا کیے گئے، جبکہ 14 کروڑ 30 لاکھ ڈالر سود کی صورت میں ادا کیے گئے ہیں۔

مرکزی بینک کا کہنا ہے کہ یہ ادائیگیاں اصل تاریخ سے ایک روز پہلے ہی مکمل کر لی گئی تھیں، جو پاکستان کی مالی ذمہ داریوں کی بروقت ادائیگی کی عکاسی کرتی ہیں۔