کاروباری افراد کے لیے بڑی خُوشخبری

وزیر اعلیٰ پنجاب مریم نواز نے صوبے کے چھوٹے کاروباری افراد کی مدد کیلئے ’’کاروبار کارڈ‘‘ اسکیم کا اعلان کر دیا۔

تفصیلات کے مطابق وزیر اعلیٰ پنجاب مریم نواز نے صوبے کے چھوٹے کاروباری افراد کیلئے ’کاروبار کارڈ‘ اسکیم کا اعلان کرتے ہوئے کہا کہ ’یہ اسکیم چھوٹے کاروباری اداروں کو مالی مدد فراہم کرے گی، جس سے انہیں اپنے آپریشنز کو بڑھانے میں مدد ملے گی۔‘

میڈیا رپورٹس کے مطابق وزیر اعلیٰ مریم نواز شریف نے چھوٹے اور درمیانے درجے کے قرضوں کی اسکیموں کے حوالے سے تفصیلی پلان بھی طلب کرلیا ہے، تاہم صوبے میں تجارتی سرگرمیوں کو فروغ دینے کیلئے بلا سود قرضوں کی فراہمی کا ابتدائی فیصلہ کیا گیا ہے۔

مزید پڑھیں:ہانیہ عامر نے وزیر اعلیٰ مریم نواز سے مدد مانگ لی

علاوہ ازیں درمیانے درجے کے کاروباری اداروں کیلئے وزیراعلیٰ کی ایزی بزنس فنانسنگ اسکیم کی تجویز کی بھی منظوری دی گئی ہے۔ اس اسکیم کے تحت اہل کاروباری اداروں کو ایک لاکھ روپے سے لے کر ایک کروڑ روپے تک کے قرضے دیے جائیں گے۔

تجویز میں درمیانے درجے کے کاروباری اداروں کو مزید مدد فراہم کرنے کیلئے قرض کی رقم میں 3 کروڑ روپے تک دینے کی توسیع بھی شامل ہے۔ حکومت پنجاب نے اپنے وسیع تر اقتصادی وژن کو مدنظر رکھتے ہوئے بڑے شہروں میں چھوٹی اور درمیانی صنعتوں کیلئے مخصوص زون قائم کرنے پراتفاق کیا ہے۔

مجوزہ تجویز میں یہ بات بھی سامنے آئی ہے کہ کاروباری افراد کو بہتر وسائل اور مدد فراہم کی جائے تاہم یہ بھی تجویز کیا گیا ہے کہ آئی ٹی جیسے کچھ ترجیحی شعبوں کو قرضوں تک ترجیحی رسائی حاصل ہو۔