فی تولہ سونا تاریخ میں پہلی بار 3 لاکھ روپے سے تجاوز کر گیا

پاکستان میں فی تولہ سونے کی قیمت مزید اضافے کے بعد تین لاکھ روپے سے بھی تجاوز کر گئی ہے۔

آل پاکستان جیمز اینڈ جیولرز ایسوسی ایشن کے مطابق ملک میں 24 قیراط کا حامل ایک تولہ سونا مزید 1346 روپے مہنگا ہوا ہے جس کے بعد فی تولہ سونے کا نرخ ملکی تاریخ میں پہلی بار 3 لاکھ 46 روپے پر پہنچ گیا۔

ایسوسی ایشن کے مطابق 24 قیراط کے حامل 10 گرام سونے کی قیمت 1154 روپے اضافے کے بعد 2 لاکھ 57 ہزار 241 روپے ہوگئی ہے۔

جمعہ کے روز سونے کی بین الاقوامی قیمت ریکارڈ سطح پر پہنچ گئی جس کی قیمت 2,869 ڈالر فی اونس (20 ڈالر کے پریمیم کے ساتھ) تھی اور اس میں دن کے دوران 10 ڈالر کا اضافہ ہوا۔
واضح رہے کہ جمعرات کو سونے کی فی تولہ قیمت 900 روپے کمی کے بعد 2 لاکھ 98 ہزار 700 روپے ہوگئی تھی۔

صرافہ ایسوسی ایشن کے مطابق ملک میں چاندی کی فی تولہ قیمت 51 روپے اضافے سے 3 ہزار 378 روپے ہوگئی۔

سونے کی قیمتوں میں اضافہ اہم امریکی پے رول رپورٹ سے قبل حال ہی میں امریکا اور چین کے درمیان تجارتی جنگ کے خدشات کے باعث ہوا ہے۔

یہ بھی پڑھیں: پاکستان معاشی استحکام کی بحالی میں پیشرفت کر رہا ہے، فچ

سنگاپور سے تعلق رکھنے والے ڈیلر گولڈ سلور سینٹرل کے منیجنگ ڈائریکٹر برائن لین نے خبر رساں ادارے روئٹرز کو بتایا کہ ‘یہ اب بھی ایک ٹرینڈنگ مارکیٹ ہے اور ہم سونے کی قیمتوں کو نئی بلندیوں کی جانب بڑھتے ہوئے دیکھیں گے۔

امریکی صدر ڈونالڈ ٹرمپ نے میکسیکو، کینیڈا اور چین کی مصنوعات پر بھاری ٹیرف عائد کرنے کا حکم دیا تھا۔

ٹرمپ نے کینیڈا، میکسیکو پر اضافی ٹیرف 30 دن کے لیے روک دیا مگر چین پر بھاری ٹیرف عائد کرنے کا فیصلہ برقرار رکھا ہے۔

کہا جا رہا ہے کہ امریکی صدر کے اس فیصؒے سے ایک تجارتی جنگ شروع ہو جائے گی جو عالمی ترقی کو متاثر کر سکتی ہے اور افراط زر کو دوبارہ بھڑکا سکتی ہے۔

اس کے بدلے میں چین نے امریکی ٹیرف کے فوری جواب میں امریکی درآمدات پر محصولات عائد  کرنے کا اعلان کیا ہے۔