بھارت میں تمام شہریوں کو پنشن دینے کےلیے پنشن اسکیم پر کام شروع

بھارت میں مرکزی حکومت کی جانب سے تمام شہریوں کو پنشن دینے پر غور کیا جارہا ہے۔

دنیا بھر میں پنشن کا حق عام طور پر ریٹائرڈ سرکاری ملازمین کو دیا جاتا ہے، لیکن بھارت میں مرکزی حکومت ایک ایسے منصوبے پر غور کر رہی ہے جس کے تحت صرف سرکاری ملازمین ہی نہیں، بلکہ تمام شہریوں کو پنشن کی سہولت فراہم کی جائے گی۔

 بھارتی میڈیا کے مطابق حکومت ‘یونیورسل پنشن اسکیم’ پر کام کر رہی ہے، جس سے غیر منظم شعبے میں کام کرنے والے کروڑوں بھارتی شہریوں کو بھی فائدہ پہنچے گا۔

اس نئی اسکیم کے تحت ان کروڑوں بھارتی شہریوں کو بھی پنشن کی سہولت دی جائے گی جو سرکاری یا منظم نجی شعبوں کے بجائے غیر منظم اداروں میں کام کرتے ہیں۔ اس میں تعمیراتی شعبے کے مزدور، گھریلو ملازمین اور دیگر ایسے پیشہ ور افراد شامل ہوں گے جو حکومت کی کسی بڑی بچت اسکیم کا حصہ نہیں ہیں۔

رپورٹس کے مطابق اس یونیورسل پنشن اسکیم میں رقم جمع کرنا رضاکارانہ ہوگا اور حکومت اپنی طرف سے اس میں مالی تعاون نہیں دے گی۔ تاہم، اس اسکیم میں کچھ موجودہ پنشن اسکیموں کو بھی شامل کیا جا سکتا ہے اور شہریوں کے لیے حکومت کے زیر انتظام بچت کے ڈھانچے کو مزید ہموار کیا جائے گا۔

یہ نئی اسکیم سیلف ایمپلائڈ (خود روزگار) اور تنخواہ دار ملازمین کے لیے بھی دستیاب ہوگی۔ اسے ‘نئی پنشن اسکیم’ کا نام دیا جا رہا ہے، اور ذرائع کے مطابق تجویز کی دستاویز مکمل ہونے کے بعد اسٹیک ہولڈرز کے ساتھ مشاورت شروع کر دی جائے گی۔

بھارت میں موجودہ نیا پنشن سسٹم (این پی ایس) 18 سے 70 سال کی عمر کے تمام شہریوں کے لیے دستیاب ہے، جس میں بیرون ملک مقیم بھارتی شہری بھی شامل ہیں۔ یہاں تک کہ کارپوریٹ ادارے بھی اس اسکیم کا انتخاب کر سکتے ہیں اور اپنے ملازمین کو اس کے فوائد پہنچا سکتے ہیں۔