فری سولر پینل اسکیم سے متعلق بڑی خبر آگئی

فری سولر پینل اسکیم سے متعلق بڑی خبر آگئی ہے۔

پنجاب حکومت نے صوبے بھر میں عوام کو مہنگی بجلی سے ریلیف فراہم کرنے کے لیے "فری سولر پینل اسکیم” کا باقاعدہ آغاز کر دیا ہے۔ وزیراعلیٰ پنجاب مریم نواز نے اس اسکیم کے تحت سولر پینلز کی تنصیب کا عمل تیز کرنے کی ہدایت جاری کرتے ہوئے کہا کہ اس منصوبے کو جلد از جلد پایہ تکمیل تک پہنچایا جائے۔

وزیراعلیٰ پنجاب مریم نواز نے منگل کو چیف منسٹر پنجاب فری سولر پینل اسکیم کا باضابطہ افتتاح کیا۔ اس موقع پر سولر پینل اسکیم کے لیے خودکار ڈیجیٹل قرعہ اندازی بھی ہوئی، جس میں کامیاب ہونے والے خوش نصیب صارفین کو مبارکباد دی گئی۔

اس موقع پر سیکرٹری انرجی نے وزیراعلیٰ پنجاب کو اسکیم سے متعلق بریفنگ دیتے ہوئے کہا کہ اس اسکیم کے تحت سال بھر میں 94 ہزار 483 سولر سسٹمز نصب کیے جائیں گے۔ صوبے میں ماہانہ 200 یونٹ تک بجلی استعمال کرنے والے صارفین کو یہ سولر سسٹم مفت فراہم کیا جائے گا۔ اس سکیم کے لیے 8 لاکھ 61 ہزار سے زائد صارفین نے درخواستیں جمع کرائی تھیں۔

اسکیم کا تمام عمل اینڈ ٹو اینڈ ڈیجیٹلائزڈ ہے، جس میں صارفین کے ماہانہ بل پر درج ریفرنس نمبر اور سی این آئی سی نمبر کے ذریعے تصدیق کی جائے گی۔ سولر پینل اور انورٹر کو چوری سے بچانے کے لیے انہیں صارف کے کمپیوٹرائزڈ شناختی کارڈ سے منسلک کیا جائے گا۔

پنجاب میں ایک لاکھ سولر سسٹمز نصب ہونے سے 57 ہزار ٹن کاربن کے اخراج میں کمی آئے گی، جس سے ماحولیاتی آلودگی کم ہوگی۔ اس کے علاوہ اس اسکیم سے وفاقی حکومت پر سبسڈی کا بوجھ بھی کم ہوگا۔

فزیکل ویری فکیشن کے بعد مارچ کے آخر تک صوبے بھر میں سولر سسٹمز کی تنصیب کا عمل شروع ہو جائے گا، جبکہ جولائی کے آخر تک اسکیم کا پہلا فیز مکمل ہونے کی توقع ہے۔

وزیراعلیٰ پنجاب مریم نواز نے سولر پینلز کی تنصیب کے عمل میں کسی قسم کی تاخیر کیے بغیر اسے جلد از جلد مکمل کرنے کی ہدایت کی۔ انہوں نے کہا کہ حکومت کا مقصد عوام کو مہنگی بجلی سے ریلیف فراہم کرنا ہے، لہٰذا اس اسکیم کو ترجیحی بنیادوں پر پایہ تکمیل تک پہنچایا جائے۔