7 ارب ڈالر کے آئی ایم ایف قرض پروگرام کے پہلے جائزے پر مذاکرات شروع

پاکستان اور بین الاقوامی مالیاتی فنڈ (آئی ایم ایف) کے درمیان تکنیکی مذاکرات مکمل ہونے کے بعد 7 ارب ڈالر کے قرض پروگرام کے حوالے سے پالیسی سطح پر بات چیت پہلے مرحلے میں داخل ہو گئی ہے۔

ناتھن پورٹر کی سربراہی میں آئی ایم ایف کے وفد نے وفاقی وزیر خزانہ محمد اورنگزیب اور ان کی معاشی ٹیم بشمول سیکریٹری خزانہ اور فیڈرل بورڈ آف ریونیو (ایف بی آر) سے ملاقات کی جس میں جولائی 2023 سے فروری 2024 تک پاکستان کی معاشی کارکردگی کا جائزہ لیا گیا۔

حکومت نے قرض پروگرام کی شرائط پر سختی سے عمل کرنے کے اپنے عزم کا اعادہ کیا ہے۔ توقع ہے کہ یہ مذاکرات دو ہفتوں تک جاری رہیں گے جس میں اہم مالیاتی اشاریوں، محصولات کی وصولی، ٹیکس اور توانائی کے شعبے میں اصلاحات اور مجموعی میکرو اکنامک صورتحال پر توجہ مرکوز کی جائے گی۔

جائزہ مشن اپنی سفارشات آئی ایم ایف کے ایگزیکٹو بورڈ کو پیش کرے گا جس سے توقع ہے کہ مارچ کے آخر یا اپریل کے اوائل تک 1.1 ارب ڈالر کی اگلی قسط کے اجراء کے بارے میں فیصلہ کیا جائے گا۔

ذرائع کا کہنا ہے کہ پاکستان کی اقتصادی ٹیم نے آئی ایم ایف کے وفد کو میکرو اکنامک استحکام، محصولات کی وصولی میں بہتری اور نجکاری کی کوششوں میں پیش رفت پر بریفنگ دی۔

وفد کو بتایا گیا کہ ملکی شرح تبادلہ اور زرمبادلہ کے ذخائر مستحکم رہے ہیں جبکہ مالی خسارے اور پرائمری بیلنس میں بہتری کے اشارے ملے ہیں۔

اقتصادی اشاریوں اور اصلاحات پر بریفنگ

اجلاس میں اکنامک ونگ، بجٹ ونگ، ایکسٹرنل فنانس ونگ، ریگولیشنز ونگ اور ڈی جی ڈیٹ کے افسران نے شرکت کی۔ چیئرمین ایف بی آر راشد محمود لنگڑیال اور ان کی ٹیم نے جولائی 2023 سے جنوری 2024 تک محصولات کی وصولی کے رجحانات کا جائزہ پیش کیا۔

وزارت خزانہ نے گرین انیشی ایٹو پر ایک رپورٹ بھی پیش کی جس میں آئی ایم ایف کی سفارشات کے مطابق پاکستان کی جانب سے شروع کیے گئے موسمیاتی تبدیلی کے منصوبوں کی تفصیلات شامل ہیں۔

ملاقات کے دوران وسیع تر اقتصادی جائزے کے حصے کے طور پر پی ایس ڈی پی اخراجات اور ممکنہ بجٹ کٹوتی پر بھی تبادلہ خیال کیا گیا۔

حکومت نے آئی ایم ایف کو یقین دلایا ہے کہ وہ قرضوں کی شرائط کی تعمیل کو یقینی بنانے کے لئے خاص طور پر ٹیکس اور توانائی کے شعبوں میں متفقہ معاشی اصلاحات کے لئے پرعزم ہے۔