وسطی ایشیائی ممالک کے ساتھ تجارتی تعلقات کا فروغ؛ ملکی معیشت کی خوشحالی کا ضامن

وسطی ایشیائی ممالک کے ساتھ تجارتی تعلقات کا فروغ ملکی معیشت کی خوشحالی کا ضامن ہے۔

ایس آئی ایف سی کے تعاون سے وسطی ایشیائی ممالک کے ساتھ تجارتی تعلقات کے فروغ کے لیے مثبت اقدامات کیے گئے۔

اس ضمن میں وزیر اعظم پاکستان نے آذربائیجان اور ازبکستان کا اہم دورہ کیا جس دوران پاکستان اور ازبکستان کی جانب سے تجارتی تعلقات کو مزید مستحکم کرنے کے لیے مفاہمتی یادداشتوں پر دستخط کیے گئے۔

دونوں ممالک کے درمیان مشترکہ منصوبوں کے ذریعے ٹیکسٹائل، زراعت اور دواسازی کے شعبوں میں ترقی متوقع ہے۔ ازبکستان میں پاکستانی مصنوعات جیسے چاول، تل کے بیج، ملبوسات اور کھیلوں کا سامان وسیع پیمانے پر برآمد کیا جا رہا ہے، جو پاکستان کی برآمدات میں اضافے کا باعث بن رہا ہے۔

 دونوں ممالک نے نجی شعبے کی شمولیت اور صنعتی تعاون کو بڑھانے کی اہمیت پر زور دیا ہے۔ اس کے ساتھ ساتھ ایک پائیدار، پرامن اور آسان تجارتی نظام کی تشکیل پر بھی توجہ دی جا رہی ہے۔ دونوں ممالک مشترکہ منصوبوں کے تحت 130 مختلف شعبوں میں سرمایہ کاری کے مواقع سے استفادہ حاصل کر رہے ہیں۔

ازبکستان-افغانستان-پاکستان ریل روڈ پروجیکٹ خطے کی تجارت کے لیے ایک اہم سنگ میل ہے۔ دونوں ممالک نے اس منصوبے کی جلد از جلد تکمیل کے عزم کا اعادہ کیا ہے۔

پاکستان اور آذربائیجان کے مابین  دوطرفہ اقتصادی تعلقات کو بڑھانے کے لیے دو ارب ڈالر کی سرمایہ کاری کے معاہدے پر بات چیت ہوئی ہے۔ دونوں ممالک نے توانائی، انفراسٹرکچر اور سرمایہ کاری کے شعبوں میں تعاون بڑھانے پر اتفاق کیا ہے۔

دنیا بھر کے اہم ممالک کے ساتھ تعلقات استوار کرنے اور سرمایہ کاری پر اعتماد بحال کرنے میں ایس آئی ایف سی کا کردار قابل ستائش ہے۔