پیٹرولیم مصنوعات کی قیمتوں میں بڑی کمی سے متعلق اہم خبر آگئی

پیٹرولیم مصنوعات کی قیمتوں میں کمی سے متعلق اہم خبر آگئی ہے۔

عالمی منڈی میں خام تیل کی قیمتوں میں اچانک اور نمایاں کمی دیکھی گئی ہے۔ رواں سال 20 جنوری کو خام تیل کی قیمت 82 ڈالر فی بیرل تھی، جو 50 دنوں سے بھی کم عرصے میں 12 ڈالر سے زائد گر کر 69.3 ڈالر فی بیرل تک پہنچ گئی ہے۔ یوں خام تیل کی قیمت اگست 2021 کی سطح پر آ چکی ہے۔

نجی سوشل میڈیا ویب سائٹ کے مطابق عالمی منڈی میں خام تیل کی قیمتوں میں 12.7 ڈالر کی کمی کے بعد پاکستانی عوام کو امید ہے کہ ملک میں بھی پیٹرول کی قیمتوں میں نمایاں کمی کی جائے گی۔

 یاد رہے کہ اگست 2021 میں پاکستان میں پیٹرول کی قیمت 119 روپے فی لیٹر تھی۔ اب سوال یہ ہے کہ کیا پاکستان میں پیٹرول کی قیمت اگست 2021 کی سطح تک گر سکتی ہے؟ اگر ایسا ہوتا ہے تو پیٹرول کی قیمت میں 150 روپے فی لیٹر تک کی کمی ہو سکتی ہے۔

حکومت ہر 15 دن بعد پیٹرول کی قیمتوں کا جائزہ لیتی ہے اور ان میں ردوبدل کرتی ہے۔ گزشتہ 50 دنوں کے دوران عالمی منڈی میں خام تیل کی قیمتوں میں 12.7 ڈالر کی کمی کے باوجود پاکستان میں پیٹرول کی قیمتوں پر اس کے اثرات فوری طور پر نہیں دیکھے جا سکتے، کیونکہ عالمی منڈی میں قیمتوں میں کمی کے اثرات پاکستان میں تقریباً 2 ماہ بعد ظاہر ہوتے ہیں۔

معاشی تجزیہ کاروں کے مطابق اس وقت پیٹرول کی قیمت میں 10 روپے تک کی کمی ممکن ہے، جبکہ زیادہ کمی کا امکان اگلے ماہ سے ہوگا۔ پیٹرول کی قیمتوں میں کمی کا حتمی فیصلہ وزارت خزانہ اور آئل اینڈ گیس ریگولیٹری اتھارٹی (اوگرا) کی سفارشات کی روشنی میں 15 مارچ کی رات کو کیا جائے گا۔

سال 2024 میں عالمی منڈی میں خام تیل کی قیمتوں میں اتار چڑھاؤ دیکھا گیا۔ خام تیل کی قیمت سب سے زیادہ 10 اپریل کو 91.17 ڈالر فی بیرل اور سب سے کم 10 ستمبر کو 70.17 ڈالر فی بیرل رہی۔ سال کے آغاز میں خام تیل کی قیمت 73.58 ڈالر فی بیرل تھی، جو اب بھی اسی سطح پر ہے۔

سال 2021 کے اگست میں عالمی منڈی میں خام تیل کی قیمت 69.75 ڈالر فی بیرل تک گر گئی تھی۔ اس وقت پاکستان میں ڈالر کی قیمت 163 روپے تھی، اور پیٹرول کی قیمت 119 روپے فی لیٹر تھی۔ اب جبکہ خام تیل کی قیمت دوبارہ 69.50 ڈالر فی بیرل تک پہنچ گئی ہے، پاکستان میں ڈالر کی قیمت 280 روپے اور پیٹرول کی قیمت 255.63 روپے فی لیٹر ہے۔

اگر موجودہ اور ماضی کے ڈالر کے ریٹ کا موازنہ کیا جائے تو خام تیل کی قیمت کے مطابق پاکستان میں پیٹرول کی قیمت 200 روپے فی لیٹر ہونی چاہیے۔ تاہم، حکومت فی الحال پیٹرول کی فروخت پر 60 روپے فی لیٹر پیٹرولیم لیوی وصول کر رہی ہے، جس کی وجہ سے قیمتوں میں کمی کے اثرات محدود ہو سکتے ہیں۔