بجلی صارفین کیلئے بری خبر آگئی

آئی ایم ایف نے بجلی کی قیمتوں میں کمی کیلئے جی ایس ٹی ختم کرنے کی تجویز مسترد کر دی ہے۔

پاکستان اور انٹرنیشنل مونیٹری فنڈ (آئی ایم ایف) کے درمیان جاری اقتصادی جائزہ مذاکرات میں توانائی شعبے کے گردشی قرضے میں کمی کا معاملہ بھی زیرِ بحث ہے۔

تاہم، آئی ایم ایف نے صنعتی اور زرعی شعبوں کے لیے ریلیف پیکج کو توسیع دینے سے انکار کر دیا ہے۔ اس کے ساتھ ساتھ بجلی کے صارفین کے بلوں پر جی ایس ٹی ختم کر کے بجلی کی قیمتوں میں کمی لانے کی تجویز کو بھی مسترد کر دیا گیا ہے۔

ذرائع کے مطابق حکومت رئیل اسٹیٹ، پراپرٹی، بیورجز اور تمباکو سیکٹر کو ریلیف دینے کی تجاویز پر غور کر رہی ہے۔ اگلے بجٹ میں تنخواہ دار طبقے پر ٹیکس کے بوجھ کو کم کرنے کی تجویز بھی زیرِ غور ہے۔ آئی ایم ایف کی منظوری کے بعد ان شعبوں پر ٹیکس کا دباؤ کم کیا جائے گا۔

اگلے بجٹ میں ریٹیل سمیت مختلف شعبوں سے 250 ارب روپے ٹیکس وصولی کا منصوبہ بھی بنایا گیا ہے۔ تاجر دوست اسکیم، کمپلائنس رسک مینجمنٹ اور دیگر انتظامی اقدامات کے ذریعے ٹیکس وصولی کو یقینی بنایا جائے گا۔ تمام اقدامات کی حتمی منظوری آئی ایم ایف سے حاصل کی جائے گی۔

آئی ایم ایف کو یہ بھی بتایا گیا کہ گردشی قرضے پر قابو پانے کے لیے کمرشل بینکوں سے 1,250 ارب روپے قرضہ لیا جائے گا۔ یہ قرضہ 10.8 فیصد شرح سود پر حاصل کیا جائے گا اور اس سلسلے میں معاہدہ طے پا چکا ہے۔

حکومت کی جانب سے آئی ایم ایف کے ساتھ مذاکرات میں معیشت کو مستحکم کرنے اور مختلف شعبوں میں اصلاحات لانے کے لیے کوششیں جاری ہیں، تاہم آئی ایم ایف کی جانب سے کئی اہم تجاویز کو مسترد کرنے سے حکومتی منصوبوں پر اثر پڑ سکتا ہے۔