ایس آئی ایف سی کے تعاون سے پاکستان اور ترکی کے درمیان تجارتی تعاون میں نئی پیشرفت

ایس آئی ایف سی کے تعاون سے پاکستان اور ترکی کے درمیان سرمایہ کاری و تجارتی تعاون میں نئی پیشرفت ہوئی ہے۔

پاکستان اور ترکی کے درمیان سرمایہ کاری اور تجارتی تعاون کو نئی بلندیوں تک لے جانے کے لیے اہم پیشرفت ہوئی ہے۔ اس سلسلے میں ایس آئی ایف سی کے تعاون سے حکومت پاکستان نے سرمایہ کاری کو فروغ دینے کے لیے ایک مربوط حکمت عملی تیار کی ہے۔ دونوں ممالک نے 5 ارب ڈالر کے تجارتی ہدف کے حصول کے لیے عملی اقدامات پر زور دیا ہے۔

پاکستان اور ترکی نے سیاحت، تعلیم، انفارمیشن ٹیکنالوجی (آئی ٹی)، بنیادی ڈھانچہ (انفراسٹرکچر)، اور دفاعی شعبوں کے ساتھ ساتھ جدید ٹیکنالوجی کی منتقلی پر مزید تعاون کو فروغ دینے کا فیصلہ کیا ہے۔ اس کے علاوہ پاکستانی کھیلوں کے سامان اور جراحی آلات کی برآمدات میں اضافے کے ذریعے تجارتی تعاون کو مزید مستحکم کرنے کا عزم ظاہر کیا گیا ہے۔

دونوں ممالک نے مشترکہ تاریخ اور ثقافت کی بنیاد پر طلباء کے تبادلے کے ذریعے تعلیمی اور برادرانہ تعلقات کو مزید مضبوط بنانے کی خواہش کا اظہار کیا ہے۔ اس سلسلے میں دونوں ممالک نے "شورائے اخوت” کے قیام پر اتفاق کیا ہے، جو دوطرفہ اور عالمی امور پر مشاورت اور ہم آہنگی کے لیے ایک اہم پلیٹ فارم ہوگا۔

پاکستان اور ترکی نے فری ٹریڈ ایگریمنٹ (ایف ٹی اے) کے تحت مزید اشیاء کی تجارت کے دائرہ کار کو وسعت دینے کا اعلان کیا ہے۔ ترکی نے چین پاکستان اقتصادی راہداری (سی پیک) سے منسلک ہونے کی خواہش کا اظہار کیا ہے، جس سے علاقائی انضمام اور تجارتی روابط کو فروغ ملے گا۔

تجارت کو فروغ دینے کے لیے دونوں ممالک نے تجارتی نمائشوں کے انعقاد کا عزم ظاہر کیا ہے۔ پاکستانی تاجروں کو ترکی میں کاروباری مواقع تلاش کرنے کی دعوت دی گئی ہے۔ اس کے ساتھ ساتھ، ترک کمپنیوں کے لیے کاروباری عمل کو آسان بنانے میں ایس آئی ایف سی کے کلیدی کردار کی تعریف کی گئی ہے۔

دونوں ممالک کے درمیان تجارتی روابط کو مزید مستحکم بنانے کے لیے اسلام آباد-استنبول مال بردار ٹرین کی بحالی پر کام جاری ہے۔ یہ اقدام دونوں ممالک کے درمیان تجارتی سرگرمیوں کو تیز کرنے میں اہم کردار ادا کرے گا۔

ایس آئی ایف سی نے عالمی برادری کے اعتماد کی بحالی کے ذریعے پاکستان میں غیرملکی سرمایہ کاری کو فروغ دینے اور معاشی ترقی کی راہیں ہموار کرنے میں اہم کردار ادا کیا ہے۔ اس کے اقدامات سے نہ صرف ملک میں سرمایہ کاری کا ماحول بہتر ہوا ہے بلکہ بین الاقوامی تاجروں اور سرمایہ کاروں کے لیے پاکستان ایک پرکشش مقام بن گیا ہے۔

پاکستان اور ترکی کے درمیان بڑھتے ہوئے تجارتی و اقتصادی تعاون سے دونوں ممالک کو معاشی ترقی کے نئے مواقع میسر آئیں گے۔ اس تعاون سے نہ صرف دونوں ممالک کے درمیان تجارتی حجم میں اضافہ ہوگا بلکہ خطے میں اقتصادی استحکام کو بھی فروغ ملے گا۔