حکومت نے بٹ کوائن مائننگ کے فروغ کیلئے اہم فیصلہ کر لیا

اسلام آباد: حکومت نے بٹ کوائن مائننگ اور اے آئی ڈیٹا سینٹرز کی ترقی اور فروغ کیلئے2 ہزار میگاواٹ بجلی مختص کرنے کا اعلان کر دیا۔

 وزارت خزانہ سے جاری بیان کے مطابق منصوبے کا مقصد اضافی بجلی کو منافع بخش بنانا، ہائی ٹیک ملازمتیں پیدا کرنا، اربوں ڈالر کی غیر ملکی سرمایہ کاری کو متوجہ کرنا اور حکومتی آمدن میں نمایاں اضافہ کرنا ہے۔

 وزیر خزانہ محمد اورنگزیب نے کہا کہ یہ اسٹریٹیجک اقدام پاکستان کے ڈیجیٹل تبدیلی کے سفر میں اضافی توانائی کو جدت، سرمایہ کاری اور بین الاقوامی آمدنی میں بدل کر اقتصادی صلاحیتوں سے بھرپور استفادہ میں معاون ثابت ہو گا۔

اس حوالے سے پاکستان کرپٹو کونسل کے سی ای او بلال بن ثاقب نے کہا کہ اس اقدام سے پاکستان ایک عالمی کرپٹو اور اے آئی پاور ہاؤس بن سکتا ہے۔

خیال رہے کہ بِٹ کوائن ایک کرپٹو کرنسی ہے ڈیجیٹل کرنسی بھی کہا جاسکتا ہے مگر یہ دنیا بھر میں استعمال ہونے والی کرنسیوں سے مختلف ہے کیونکہ اسے کنٹرول کرنے کیلئے کوئی مستند مالی ادارہ نہیں ہے۔