"لگژری لائف اسٹائل اور گوشواروں کے فرق والے ٹیکس دینے کی تیاری کرلیں”

سینیٹر فیصل واوڈا کا کہنا ہے بڑے کریک ڈاؤن کی تیاری کر لی گئی ہے، لگژری لائف اسٹائل اور گوشواروں کے فرق والے ٹیکس دینے کی تیاری کرلیں۔

سوشل میڈیا پر جاری بیان میں فیصل واوڈا نے لکھا کہ انکم ٹیکس گوشواروں کی آخری تاریخ تک اگرپچھلے سال کے مقابلے میں ٹیکس کی شرح میں کم از کم 15 فیصد اضافہ ہوا تو اس صورت میں پچھلے سالوں کے گوشواروں کو نظرانداز کیا جا سکتا ہے۔

فیصل واوڈا نے مزید لکھا دوسری صورت میں اگلے پچھلے سارے گواشوارے کھول دیئے جائیں گے، سخت کریک ڈاؤن کی تیاری ہے، 30 فیصد میں بھی جان نہیں چھوٹے گی۔

انہوں نے بتایا کہ سوشل میڈیا میں لگژری لائف اسٹائل اور گوشواروں کے فرق کی لسٹیں تیار کر لی گئی ہیں، ٹیکس دینے کی تیاری کریں۔

سینیٹر فیصل واوڈا نے بتایا کہ ٹیکس چوری کرنے والے افراد اور کمپنیوں کی نشاندہی کرنے والوں کیلئے بڑے انعام کا فیصلہ ہو چکا، وسل بلورز کی تفصیلات صیغہ راز میں رکھنے کا بھی فیصلہ ہوچکا ہے۔

انکا کہنا تھا کہ ان سب کیلئے ایف بی آر اپنے قوانین کے تحت کارروائی کا مجاز ہوگا، دوستو پھر نہ کہنا میں نے اطلاع نہیں دی۔