پاکستانی طلبہ کے لیے خوشخبری، حکومت کا اہم اعلان

وفاقی حکومت نے تمام تعلیمی بورڈز کے میٹرک پوزیشن ہولڈرز کے لیے اہم اعلان کردیا ہے۔

وفاقی حکومت نے تمام تعلیمی بورڈز کے میٹرک پوزیشن ہولڈرز کے لیے ترکی کے خصوصی دورے کا پروگرام شروع کر دیا ہے۔ یہ پروگرام وزارتِ وفاقی تعلیم و پیشہ ورانہ تربیت اور ڈائریکٹوریٹ جنرل آف امیگریشن اینڈ پاسپورٹس کے اشتراک سے منعقد کیا جا رہا ہے، جس کے تحت منتخب طلبہ سرکاری پاسپورٹس پر ترکی کا سفر کریں گے۔

انٹر بورڈ کمیٹی آف چیئرمنز (آئی بی سی سی) کی جانب سے جاری کردہ نوٹیفکیشن میں بتایا گیا ہے کہ اس پروگرام میں شامل ہونے والے طلبہ کو چند شرائط پوری کرنا ہوں گی جن میں سرکاری اسپتال سے میڈیکل فٹنس سرٹیفیکیٹ حاصل کرنا، والدین یا سرپرست کا تحریری اجازت نامہ، دو سفید شلوار قمیض کے جوڑے اور جوتے ساتھ لے جانا شامل ہے۔

 اس کے علاوہ وزارت کی جانب سے طلبہ کو سبز بلیزر فراہم کیے جائیں گے جبکہ ہر طالب علم کو صرف ایک شولڈر بیگ لے جانے کی اجازت ہوگی۔ لیپ ٹاپ، کیمرہ اور دیگر الیکٹرانک آلات لے جانا سختی سے منع ہے۔ والدین یا سرپرست کا ہنگامی رابطہ نمبر فراہم کرنا بھی لازمی قرار دیا گیا ہے۔

آئی بی سی سی نے تعلیمی بورڈز کو ہدایت کی ہے کہ وہ منتخب طلبہ کے پاسپورٹ اور دیگر مطلوبہ دستاویزات 19 ستمبر 2025 تک آئی بی سی سی سیکریٹریٹ اسلام آباد بھجوا دیں تاکہ ترکی کے حکام کے ساتھ بروقت ہم آہنگی اور کارروائی ممکن ہو سکے۔ مزید برآں، تعلیمی بورڈز پک اینڈ ڈراپ کی سہولت بھی فراہم کریں گے تاکہ طلبہ کو سہولت فراہم کی جا سکے۔

تمام بورڈز کے چیئرمین اس پروگرام کی نگرانی کریں گے اور طلبہ کی رسمی کارروائی میں مکمل مدد فراہم کریں گے تاکہ یہ دورہ خوش اسلوبی سے مکمل ہو۔ اس اہم اقدام سے پاکستان کے میٹرک پوزیشن ہولڈرز کو ایک یادگار اور مفید تجربہ حاصل ہوگا۔