23 سے 27 ستمبر تک سندھ بھر کے سرکاری اسکولز مکمل طور پر بند رکھنے کا اعلان

سندھ ایمپلائز الائنس نے اعلان کیا ہے کہ 23 سے 27 ستمبر تک صوبے بھر کے سرکاری اسکولز، کالجز اور دفاتر مکمل طور پر بند رہیں گے۔

یہ فیصلہ حکومت سندھ کے مبینہ غیر جمہوری رویے اور ملازمین کے دیرینہ مطالبات کی عدم منظوری کے خلاف احتجاج کے طور پر کیا گیا ہے۔ اتحاد کی قیادت کا کہنا ہے کہ احتجاجی تحریک اس وقت تک جاری رہے گی جب تک سرکاری ملازمین کے بنیادی حقوق کو تسلیم نہیں کیا جاتا۔

ورکرز کنونشن کے دوران اسکولوں اور کالجز کے اساتذہ سمیت دیگر سرکاری عملے نے بھی احتجاجی مہم میں شامل ہونے کا اعلان کیا، جبکہ 6 اکتوبر کو بلاول ہاؤس کے سامنے دھرنے کا بھی اعلان کیا گیا ہے۔

 ذرائع کے مطابق ملازمین نے واضح کیا ہے کہ یہ ہڑتال صرف پانچ دن تک محدود نہیں رہے گی بلکہ مطالبات کی منظوری تک غیر معینہ مدت تک بھی جاری رہ سکتی ہے۔

اس فیصلے سے صوبے بھر میں تعلیمی سرگرمیاں بری طرح متاثر ہونے کا خدشہ ہے، جبکہ کراچی سے کشمور تک طلبہ اور والدین کو شدید مشکلات کا سامنا کرنا پڑ سکتا ہے۔ ملازمین کا مؤقف ہے کہ وہ اپنے جائز حقوق کے حصول کے لیے پُرامن مگر مؤثر احتجاج پر مجبور ہیں۔