وزیراعظم لیپ ٹاپ اسکیم میں درخواست دینے والے طلبا کے لئے اہم خبر آگئی

وزیراعظم کی جانب سے لیپ ٹاپ اسکیم 2025 دوبارہ شروع کر دی گئی ہے، جس کے تحت ملک بھر کی یونیورسٹیوں اور کالجوں کے ہزاروں طلبہ کو مفت لیپ ٹاپ فراہم کیے جائیں گے۔

 اس اسکیم کا مقصد ایسے طلبہ کو ڈیجیٹل سہولیات مہیا کرنا ہے جو مالی مشکلات کی وجہ سے لیپ ٹاپ خریدنے سے قاصر ہیں۔ لیپ ٹاپ کے ذریعے طلبہ آن لائن کلاسز، ریسرچ ورک کے علاوہ فری لانسنگ اور ریموٹ ورک کے ذریعے اپنی مالی مدد بھی کر سکیں گے۔

حکومت نے طلبہ کی سہولت کے لیے درخواست کے اسٹیٹس چیک کرنے کا ایک نیا آن لائن نظام بھی متعارف کرایا ہے۔ اب طلبہ PM Youth Programme کی ویب سائٹ laptop.pmyp.gov.pk پر جا کر اپنا قومی شناختی کارڈ نمبر اور یونیورسٹی منتخب کر کے فوری طور پر درخواست کی موجودہ صورتحال جان سکیں گے کہ آیا ان کی درخواست منظور ہوئی ہے، زیرِ غور ہے یا مسترد کر دی گئی ہے۔

حکام کا کہنا ہے کہ درخواستیں زیادہ تر ادھوری یا غلط معلومات کی وجہ سے مسترد ہوتی ہیں، اس لیے طلبہ کو چاہیے کہ درخواست دیتے وقت درست CNIC یا B فارم، یونیورسٹی ان رولمنٹ کا ثبوت، حالیہ تعلیمی ٹرانسکرپٹ اور یونیورسٹی ڈیٹا بیس میں اپ ڈیٹ شدہ ذاتی معلومات فراہم کریں۔

 سب سے عام غلطیوں میں CNIC کا غلط اندراج، غیر فعال فون نمبر یا ای میل، تعلیمی ریکارڈ کی اپ ڈیٹ نہ ہونا اور ایک ہی CNIC پر متعدد درخواستیں شامل ہیں۔

اگر کسی طالب علم کا نام فہرست میں شامل نہیں ہوتا تو اسے اپنی یونیورسٹی کے فوکل پرسن سے رابطہ کرنا چاہیے، یا PM Youth Programme کی ہیلپ لائن پر شکایت درج کروائی جا سکتی ہے۔ بعض اوقات یونیورسٹی کی جانب سے ویری فیکیشن میں تاخیر، ادھوری دستاویزات، شپمنٹ میں مسائل اور بجٹ کی منظوری میں تاخیر کی وجہ سے لیپ ٹاپ کی فراہمی میں تاخیر ہو جاتی ہے۔

 محکمہ تعلیم نے طلبہ کو ہدایت کی ہے کہ وہ اپنی یونیورسٹی سے مسلسل رابطے میں رہیں اور رابطہ نمبر و ای میل ایڈریس ہمیشہ اپ ڈیٹ رکھیں تاکہ اسکیم سے فائدہ اٹھانے میں کوئی دشواری نہ ہو۔