میٹرک اور انٹر طلبا کے لئے بڑی خبر آگئی

سندھ میں ای مارکنگ سسٹم کا باقاعدہ آغاز ہو چکا ہے اور متعدد تعلیمی بورڈز نے پیپرز کی ای مارکنگ پر تجرباتی عمل شروع کر دیا ہے۔

 اس حوالے سے صوبائی وزیر جامعات محمد اسماعیل راہو کی صدارت میں تین گھنٹے طویل اجلاس منعقد ہوا جس میں سیکریٹری جامعات محمد عباس بلوچ، تمام تعلیمی بورڈز کے چیئرمینز اور دیگر افسران نے شرکت کی۔

 اجلاس میں محکمہ جامعات کی کارکردگی، تعلیمی بورڈز میں اصلاحات اور پیپرز کی ای مارکنگ کے حوالے سے تفصیلی بریفنگ دی گئی۔ اجلاس میں بتایا گیا کہ نوابشاہ اور سکھر تعلیمی بورڈز نے تمام امتحانات کو ای پیپرنگ اور آٹومیشن سسٹم پر منتقل کر دیا ہے، جبکہ کراچی، حیدرآباد، لاڑکانہ اور میرپورخاص بورڈز نے بھی کم از کم ایک ایک پیپر ای مارکنگ کے تحت کرانے کا تجربہ کیا ہے۔

 لاڑکانہ بورڈ نے نویں اور گیارہویں جماعت کے پیپرز ای مارکنگ کے ذریعے منعقد کیے۔ وزیر جامعات نے کہا کہ ای مارکنگ سے شفافیت اور جدیدیت میں اضافہ ہوگا اور بجلی کے بحران کے پیش نظر لاڑکانہ اور کراچی میٹرک بورڈز کو سولر انرجی پر منتقل کرنے کا فیصلہ کیا گیا ہے تاکہ امتحانی اور دفتری امور بلا تعطل جاری رہ سکیں۔

 انہوں نے بورڈز کو ہدایت کی کہ طلبہ کے مسائل کا فوری حل یقینی بنایا جائے اور تمام بورڈز کو جلد از جلد ای مارکنگ اور آٹومیشن سسٹم پر منتقل کیا جائے۔ اسماعیل راہو نے مزید بتایا کہ محکمہ جامعات و بورڈز میں ترقیوں کا باقاعدہ نظام بنایا گیا ہے اور قانونی و پالیسی اصلاحات کی گئی ہیں تاکہ ملازمین کے حقوق بروقت مل سکیں۔

 انہوں نے کہا کہ جامعات، وائس چانسلرز، ملازمین اور طلبہ کا ڈیٹا آن لائن کر دیا گیا ہے اور کاپی کلچر کے خاتمے کے لیے سخت اقدامات کیے جا رہے ہیں۔ ای مارکنگ کے نفاذ سے نہ صرف کاغذی استعمال میں کمی آئے گی بلکہ سندھ حکومت کے اخراجات میں بھی نمایاں کمی ہوگی اور ماحولیاتی بہتری میں مدد ملے گی۔