تعلیمی اداروں میں ایک ہفتے کیلئے چھٹی کا اعلان

متحدہ عرب امارات کے اسکولوں نے تعلیمی سال 2025-2026 کے پہلے سمسٹر کے لیے مڈٹرم چھٹیوں کی تاریخوں کا اعلان کر دیا ہے۔

وزارت تعلیم کی جانب سے منظور شدہ تعلیمی کیلنڈر کے مطابق تمام سرکاری اور نجی اسکولوں میں یہ تعطیلات یکساں ہوں گی۔ والدین اور تدریسی عملے کو جاری کردہ سرکلر میں بتایا گیا ہے کہ طلباء کے لیے وسط مدتی وقفہ 13 اکتوبر سے شروع ہو کر 17 اکتوبر تک جاری رہے گا۔

اس دوران تمام گریڈز کی کلاسیں بند رہیں گی اور تعلیمی سرگرمیاں روک دی جائیں گی۔ کلاسیں دوبارہ 20 اکتوبر سے شروع ہوں گی تاکہ طلباء اپنی پڑھائی دوبارہ شروع کر سکیں۔

اساتذہ اور انتظامی عملے کے لیے وزارت تعلیم نے 13 سے 15 اکتوبر تک خصوصی پیشہ ورانہ ترقی کے پروگرام رکھے ہیں۔ اس کے بعد 16 سے 19 اکتوبر تک ان کے لیے بھی وسط مدتی وقفہ ہوگا۔ اس وقفے کا مقصد اساتذہ کی تربیت اور استعداد کار میں اضافہ کرنا ہے تاکہ تعلیمی معیار کو بہتر بنایا جا سکے۔

یہ مڈٹرم تعطیلات طلباء اور اساتذہ دونوں کے لیے تعلیمی دباؤ کم کرنے اور تعلیمی سرگرمیوں کی بہتری کے لیے ایک اہم موقع سمجھی جاتی ہیں۔