موسم سرما کیلئے اسکولوں کے نئے اوقات کار کیا ہونگے؟ فیصلہ ہو گیا

پنجاب میں موسم سرما کے آغاز کے ساتھ ہی اسکولوں کے اوقات کار میں تبدیلی کر دی گئی ہے۔

وزیر تعلیم پنجاب رانا سکندر حیات نے ایکس پر جاری پیغام میں بتایا کہ صوبے بھر کے تمام اسکولوں میں نئی کلاسز کے اوقات صبح 8:45 بجے سے شروع ہوں گے۔ اس کے علاوہ، اسکولوں کی چھٹی کا وقت اب 1:30 بجے رکھا جائے گا۔

 اس تبدیلی کا مقصد سردیوں میں طلبا کی بہتر سہولت فراہم کرنا اور اسکولوں کے اوقات کو مناسب بنانا ہے تاکہ سردی کے اثرات کم سے کم ہوں۔

دوسری جانب پنجاب کے سرکاری اسکولوں میں زیر تعلیم ہزاروں طلبا کے پہلے سمسٹر کے امتحانات بھی مؤخر کر دیے گئے ہیں۔ محکمہ تعلیم پنجاب نے اس فیصلے کا اعلان کرتے ہوئے کہا کہ حالیہ سیلاب اور اسکولوں کی بندش کے باعث نصابی سرگرمیوں میں رکاوٹ پیدا ہوئی تھی۔ اس لیے امتحانات کا شیڈول تبدیل کیا گیا ہے۔

پہلے سمسٹر کے امتحانات 15 اکتوبر سے شروع ہونے تھے، مگر اب یہ امتحانات دسمبر کے پہلے ہفتے میں ہوں گے۔

نئی پالیسی کے تحت پہلے سمسٹر اور مڈٹرم امتحانات کو ایک ساتھ ضم کر دیا گیا ہے اور دونوں امتحانات ایک ہی مرحلے میں لیے جائیں گے۔ حکام کا کہنا ہے کہ یہ فیصلہ طلبا کو مناسب تیاری کا موقع فراہم کرنے اور تعلیمی تسلسل کو بحال کرنے کے لیے کیا گیا ہے۔

 سیلاب کی وجہ سے اسکولوں کی بندش نے تعلیمی سرگرمیوں کو متاثر کیا تھا اور اس سے بچوں کی تعلیم میں خلل پڑا تھا۔ اب جب کہ امتحانات کا شیڈول بدلا گیا ہے، طلبا کو مزید تیاری کا وقت ملے گا۔