انٹرمیڈیٹ کے امتحانات کی تاریخ کا اعلان ہوگیا

بورڈ آف انٹرمیڈیٹ اینڈ سیکنڈری ایجوکیشن (BISE) پنجاب نے سال 2026 کے انٹرمیڈیٹ سالانہ امتحانات کے لیے حتمی تاریخوں کا اعلان کر دیا ہے۔

 بورڈ آف انٹرمیڈیٹ اینڈ سیکنڈری ایجوکیشن (BISE) پنجاب کے مطابق انٹرمیڈیٹ پارٹ دوم (کلاس 12) کے امتحانات 5 مئی 2026 سے شروع ہوں گے، جبکہ پارٹ اول (کلاس 11) کے امتحانات 24 مئی 2026 سے منعقد ہوں گے۔

بی آئی ایس ای کے عہدیدار کے مطابق یہ تاریخیں صوبائی تعلیمی کیلنڈر کو مدنظر رکھتے ہوئے مقرر کی گئی ہیں تاکہ امتحانات شفاف اور منظم انداز میں منعقد کیے جا سکیں اور نتائج بروقت طلبہ تک پہنچ سکیں۔

چونکہ پنجاب کے تمام تعلیمی بورڈز مشترکہ امتحانی کیلنڈر پر عمل کرتے ہیں، اس لیے بی آئی ایس ای فیصل آباد کے اعلان کردہ شیڈول کو لاہور، راولپنڈی، ملتان، گوجرانوالہ سمیت صوبے بھر میں نافذ کیا جائے گا۔

عہدیدار نے بتایا کہ طلبہ کے لیے رول نمبر سلپس، تفصیلی ڈیٹ شیٹس اور امتحانی مراکز کی معلومات امتحانات کے قریب جاری کی جائیں گی۔ انہوں نے طلبہ سے کہا ہے کہ وہ اپنی تیاری جاری رکھیں اور تازہ ترین معلومات کے لیے اپنے متعلقہ بورڈز سے رابطے میں رہیں۔