صوبائی حکومت کا تعلیمی اداروں سے متعلق بڑا اقدام

پنجاب میں تعلیمی اداروں کی سیکیورٹی کو مزید مؤثر بنانے کے لیے پنجاب سیف سٹیز اتھارٹی نے ایک اہم قدم اٹھا لیا ہے۔

صوبے بھر کے اسکولوں اور کالجوں میں سیکیورٹی انتظامات کی نگرانی کے لیے ایک جدید ورچوئل سینٹر فار ایجوکیشنل سیکیورٹی قائم کیا جا رہا ہے۔ لاہور سمیت پنجاب کے تمام سرکاری و نجی تعلیمی اداروں کو اس نئے سسٹم سے منسلک کیا جا رہا ہے۔

اس منصوبے کے تحت اساتذہ اور سیکیورٹی اسٹاف کو سیف سٹیز سسٹم میں رجسٹر کیا جا چکا ہے۔ اب ہر ادارہ روزانہ تین مرتبہ اپنی سیکیورٹی صورتحال کی رپورٹ پبلک سیفٹی ایپ کے ذریعے اپڈیٹ کرے گا۔

سیف سٹیز حکام کا کہنا ہے کہ اب تک 30 ہزار سے زائد اسکول اور کالجز اس نظام میں شامل کیے جا چکے ہیں، جبکہ ایک لاکھ 30 ہزار سے زائد اساتذہ کی رجسٹریشن بھی مکمل ہو چکی ہے۔ اس اقدام کا مقصد تعلیمی اداروں میں کسی بھی ہنگامی صورتِ حال کی بروقت نشاندہی اور فوری کارروائی کو یقینی بنانا ہے۔

حکام کے مطابق اگر کسی ادارے کی جانب سے غیر محفوظ سیکیورٹی اسٹیٹس رپورٹ کیا جاتا ہے تو سیف سٹیز اتھارٹی فوری طور پر متعلقہ پولیس کو آگاہ کرے گی تاکہ بروقت اقدامات کیے جا سکیں۔ اس کے علاوہ تعلیمی اداروں میں نصب کیمروں کو بھی مرحلہ وار سیف سٹی کے لائیو مانیٹرنگ سسٹم سے منسلک کیا جا رہا ہے۔

سیف سٹیز حکام کا کہنا ہے کہ یہ اقدام طلبہ، اساتذہ اور والدین کے تحفظ کو یقینی بنانے کے لیے اٹھایا گیا ہے۔ اس نظام کے مکمل فعال ہونے کے بعد تعلیمی اداروں کی سیکیورٹی میں واضح بہتری متوقع ہے۔