فری لیپ ٹاپ اسکیم؛ کیا آپ اسکیم کیلئے اہل ہیں؟ اہلیت چیک کرنے کا آسان طریقہ سامنے آگیا

وفاقی حکومت نے وزیراعظم یوتھ فری لیپ ٹاپ اسکیم کے لیے نئے اہلیت کے معیار کا اعلان کر دیا ہے۔ اس اقدام کا مقصد اسکیم کو زیادہ شفاف اور جامع بنانا ہے۔

نئے قواعد کے مطابق اسکیم میں شامل ہونے کے لیے درخواست دہندگان کو کسی پبلک یا تسلیم شدہ یونیورسٹی یا کالج میں داخلہ لینا ضروری ہے۔ اسکیم اب بیچلرز، ماسٹرز، ایم فل اور پی ایچ ڈی پروگرامز میں زیر تعلیم طلبا کے لیے بھی دستیاب ہے۔

انتخاب طلبا کی تعلیمی کارکردگی، تصدیق شدہ ڈومیسائل اور دیگر مقررہ معیار کی بنیاد پر کیا جائے گا۔ حکومتی عہدیداروں کا کہنا ہے کہ یہ تبدیلیاں زیادہ طلبا کو فائدہ پہنچانے اور عمل کو منصفانہ، شفاف اور میرٹ پر مبنی بنانے کے لیے کی گئی ہیں۔

درخواست دینے کے طریقہ کار میں سب سے پہلے متعلقہ یونیورسٹی یا کالج میں رجسٹریشن مکمل کرنا ہوگی۔ اس کے بعد سرکاری اسکیم ویب سائٹ پر درخواست جمع کروائی جائے۔ تعلیمی ریکارڈز اور شناختی دستاویزات درست طریقے سے فراہم کرنا ضروری ہے۔

میرٹ لسٹ شائع ہونے کے بعد لیپ ٹاپ کی تقسیم تعلیمی کارکردگی کی بنیاد پر کی جائے گی۔ یہ اقدامات طلبا کو جدید ٹیکنالوجی تک رسائی فراہم کرنے اور تعلیمی معیار کو بہتر بنانے کے لیے کیے جا رہے ہیں۔