خاتون کی جانب سے ’اسکوئڈ گیم‘ کے معروف اداکار پر لگایا گیا ہراسانی کا الزام عدالت میں جھوٹا ثابت

جنوبی کوریا کے معروف اداکار گونگ یو پر خاتون کی جانب لگایا گیا ہراسانی کا الزام عدالت میں جھوٹا ثابت ہوگیا۔

غیر ملکی میڈیا رپورٹس کے مطابق اداکار گونگ ہتکِ عزت کے مقدمے میں جھوٹے الزامات سے بری ہو گئے۔

رپورٹ میں بتایا گیا کہ جنوبی کوریا کی عدالت نے 40 سالہ خاتون کو ہراسانی کے جھوٹے الزامات پر 6 ماہ قید کی سزا سنادی، خاتون کو جھوٹی معلومات پھیلانے اور انفارمیشن نیٹ ورک پروٹیکشن ایکٹ کی خلاف ورزی کا قصوروار ٹھہرایا گیا ہے۔

 کورین میڈیا نے بتایا کہ جنوری 2020 سے مارچ 2021 کے دوران خاتون نے 235 مرتبہ جھوٹے الزامات اور توہین آمیز تبصرے سوشل میڈیا پر پوسٹ کیے، جن میں یہ دعویٰ کیا گیا کہ گونگ یو نے انہیں ہراساں اور دھمکایا۔

تاہم تحقیقات سے ثابت ہوا کہ گونگ یو کا خاتون سے کوئی ذاتی تعلق نہیں اور تمام الزامات بے بنیاد اور جھوٹے تھے۔

عدالت نے اپنے فیصلے میں کہا کہ خاتون کے الزامات مکمل طور پر بے بنیاد تھے اور اس سے بھی بڑھ کر اس نے طویل عرصے تک بار بار جھوٹی معلومات پھیلائیں۔