تمنا بھاٹیا کا کوہلی اور عبدالرزاق سے تعلقات کی خبروں پر پہلی بار ردعمل سامنے آگیا

بھارتی اداکارہ تمنا بھاٹیا نے کرکٹر ویرات کوہلی اور سابق پاکستانی آل راؤنڈر عبدالرزاق کے ساتھ مبینہ تعلقات کی افواہوں پر پہلی بار کھل کر ردعمل دیا ہے۔

بھارتی میڈیا کے مطابق تمنا بھاٹیا نے ایک حالیہ انٹرویو میں کہا کہ 2010 میں ویرات کوہلی کے ساتھ ان کی ایک کمرشل شوٹ کی تصویر وائرل ہوئی، جس کے بعد ان کے تعلقات کی افواہیں گردش کرنے لگیں، لیکن وہ صرف ایک دن کے لیے ملی تھیں اور شوٹ کے بعد کبھی ملاقات یا بات چیت نہیں ہوئی۔

اسی طرح 2020 میں عبدالرزاق کے ساتھ خفیہ شادی کی افواہ نے زور پکڑا، جو ایک پرانی تصویر کی بنیاد پر سامنے آئی تھی جس میں دونوں کو جیولری کی دکان پر ایک ساتھ دیکھا گیا تھا۔ تمنا نے اس حوالے سے ہنستے ہوئے کہا کہ انٹرنیٹ واقعی ایک دلچسپ جگہ ہے جہاں ان کی عبدالرزاق سے شادی بھی ہو چکی تھی۔

 انہوں نے کہا کہ عبدالرزاق کے بچے بھی ہیں، لہٰذا یہ افواہ بالکل بے بنیاد ہے۔ اداکارہ نے وضاحت کی کہ وہ تصویر ایک جیولری دکان کے افتتاح کی تھی، جہاں اتفاقاً وہ دونوں موجود تھے۔

تمنا بھاٹیا نے کہا کہ جب لوگوں کے ذہنوں میں پہلے سے کوئی کہانی بن جاتی ہے تو اسے بدلنا مشکل ہوتا ہے اور لوگ جو چاہیں گے، وہی سوچیں گے۔ ہر کسی کو سمجھانا ممکن نہیں ہوتا، اور بالآخر انسان کو قبول کرنا پڑتا ہے کہ لوگوں کی سوچ کو بدلا نہیں جا سکتا۔