امیتابھ کو ساڑھے 4 کروڑ کی کار تحفے میں ملی، دینے پرکس ہدایتکار کو والدہ نے تھپڑ مارا؟

بالی وڈ ہدایتکار ودھو ونود چوپڑا نے انکشاف کیا ہے کہ انھیں امیتابھ بچن کو ساڑھے 4 کروڑ روپے مالیت کی گاڑی تحفے میں دینے پر اپنی والدہ سے تھپڑ کھانا پڑا تھا۔

ہدایتکار ودھو ونود نے ایک انٹرویو میں انکشاف کیا کہ میں نے فلم ایکلویہ: دی رائل گارڈ کی شوٹنگ کے دوران امیتابھ بچن کو اپنے قیام اور سفر کا خرچہ خود اٹھانے پر قائل کیا تھا کیوں کہ اگر میں اس فلم کیلئے امیتابھ کا خرچہ اٹھاتا تو فلم کی کاسٹ میں شامل دیگر اداکاروں سیف علی خان اور سنجے دت کے اخراجات بھی ادا کرنے پڑتے لہٰذا امیتابھ بچن کو اپنا خرچہ خود اٹھانے پر قائل کیا گیا۔

بھارتی میڈیا کے مطابق جب فلم کی شوٹنگ شروع ہوئی تو جیا بچن کو یقین تھا کہ ان کے شوہر امیتابھ بچن ڈائریکٹر ونود ودھو کو ایک ہفتے بھی برداشت نہیں کرپائیں گے جس کا اعتراف بگ بی نے فلم کے سیٹ پر بھی کیا۔

جب امیتابھ بچن فلم سیٹ پر اپنے تھوڑے سے سامان کے ساتھ پہنچے تو ودھو ونود چوپڑا حیران رہ گئے، پوچھنے پر امیتابھ نے بتایا کہ مجھے جیا نے کہا تھا کہ میں آپ کو ایک ہفتے بھی برداشت نہیں کرپاؤں گا۔

ڈائریکٹر ودھو ونود چوپڑا نے اپنے ایک انٹرویو میں اعتراف کیا کہ ہم ایک ہفتے یا 10 دن کے بعد لڑنا شروع ہوگئے لیکن دونوں کام کیلئے ڈٹے رہے اور فلم کی شوٹنگ مکمل کی۔

بعد ازاں ڈائریکٹر ونود ودھو نے فلم کی شوٹنگ کے دوران امیتابھ کے تعاون کو سراہنے کیلئے انھیں ساڑھے 4 کروڑ بھارتی روپے کی کار تحفے میں دی۔

ودھو ونود نے امیتابھ کو گاڑی دینے کی کہانی سناتے ہوئے بتایا تھا کہ میں اس واقعے کو کبھی نہیں بھول سکتا جب میں امیتابھ کو گاڑی تحفے میں دے رہا تھا اس وقت میری والدہ بھی میرے ساتھ تھیں اور میری والدہ نے ہی کار کی چابیاں امیتابھ کو تھمائی تھیں۔

ہدایتکار کے مطابق بگ بی کو گاڑی کی چابی دینے کے 2بعد میری والدہ میری  گاڑی میں آکر بیٹھ گئیں، اس وقت میرے پاس ڈرائیور بھی  نہیں تھا، اس لیے میں گاڑی خود چلا رہا تھا، والدہ نے مجھ سے سوال کیا کہ تم خود گاڑی کیوں نہیں لیتے؟

ودھو ونود کے مطابق میں نے والدہ کو کہا کہ جب وقت آئے گا میں گاڑی لے لوں گا، جس پر انھوں نے اندازہ لگاتے ہوئے کہا کہ 11 لاکھ کی تو ہوگی اور میں ہنس پڑا کیونکہ وہ نہیں جانتی تھیں کہ یہ 4.5 کروڑ روپے کی ہے۔

ہدایتکار نے بتایا کہ جب میں نے والدہ کو  امیتابھ کو دی گئی گاڑی کی قیمت بتائی تو انھوں نے مجھے بے وقوف کہتے ہوئے ایک تھپڑ مارا، وہ میں کبھی نہیں بھول سکتا کیونکہ پیسا کیا ہے اگر یہ آپ کو خوشی نہیں دے سکتا۔

واضح رہے کہ 2007 کی فلم ایکلویہ: دی رائل گارڈ کی کاسٹ میں  امیتابھ بچن، سیف علی خان، سنجے دت اور ودیا بالن شامل تھے اگرچہ  یہ فلم باکس آفس پر کامیاب نہیں ہو سکی تھی لیکن اس نے ناقدین کی تعریف حاصل کی اور فلم آسکر میں بھارت کی آفیشل انٹری بھی بنی تھی۔