پنجاب میں سیلاب نے معروف پاکستانی ٹک ٹاکر کی جان لے لی

پھالیہ میں سوشل میڈیا پلیٹ فارم ٹک ٹاک پر مقبولیت حاصل کرنے والا نوجوان اویس ویڈیو بناتے ہوئے سیلابی پانی میں ڈوب کر جان کی بازی ہار گیا۔

 پولیس کے مطابق اویس کو سیلابی پانی میں ویڈیوز بنانے کا شوق تھا، جس کی بدولت اس نے ٹک ٹاک پر شہرت حاصل کی۔ اس کے فالورز کی تعداد ایک لاکھ 64 ہزار اور لائکس 11 لاکھ 60 ہزار سے زائد تھے۔

اویس حالیہ دنوں میں مزید ویوز اور لائکس حاصل کرنے کی کوشش میں خطرناک مقامات پر ویڈیوز بنا رہا تھا۔ بدقسمتی سے ایک ویڈیو کی ریکارڈنگ کے دوران وہ گہرے پانی میں چلا گیا اور واپس نہ آ سکا۔ ریسکیو 1122 نے اس کی لاش نکال کر ورثا کے حوالے کر دی۔

ٹک ٹاک کا جنون جان لے گیا، یہ ٹک ٹاکر اویس ہے، اس کے ڈیڑھ لاکھ سے زیادہ فالوورز تھے، منڈی بہائوالدین میں دریائے چناب کے سیلابی پانی میں ویڈیوز بناتا تھا، زیادہ ویوز کےلئے گہرے پانی میں چلا گیا اور ڈوب کر جاں بحق ہو گیا، انا للہ وانا الیہ راجعون۔۔!! pic.twitter.com/EaPzLYMQuB

— Khurram Iqbal (@khurram143) September 4, 2025

یہ واقعہ اس بات کی ایک اور افسوسناک مثال ہے کہ سوشل میڈیا پر شہرت کی دوڑ میں نوجوان کس قدر خطرناک حد تک جا سکتے ہیں۔ اویس کی ہلاکت پہلا واقعہ نہیں، اس سے قبل بھی پاکستان سمیت دنیا بھر میں کئی نوجوان جان لیوا ویڈیوز بناتے ہوئے اپنی جان گنوا چکے ہیں۔