رات گئے قبرستان جاتا ہوں، وہاں خوف محسوس نہیں ہوتا، اصل خوف زندہ انسانوں سے ہے؛ ساحر لودھی

پاکستان شوبز انڈسٹری کے معروف میزبان و اداکار ساحر لودھی نے کہا ہے کہ میں رات گئے قبرستان جاتا ہوں، مجھے وہاں خوف محسوس نہیں ہوتا کیونکہ اصل خوف زندہ انسانوں سے ہے۔

حال ہی میں اپنے دیے گئے ایک انٹرویو میں معروف میزبان و اداکار ساحر لودھی نے بتایا کہ وہ اکثر ملیر کینٹ کے قبرستان جاتے ہیں کیونکہ وہاں انہیں روحانی سکون ملتا ہے، ان کے 32 سال پرانے ایک قریبی دوست کی قبر بھی وہیں ہے، وہ دوست کے جنازے میں شریک ہوئے اور خود انہیں قبر میں اتارنے والوں میں شامل تھے۔

انہوں نے کہا کہ اکثر رات کو دو سے چار بجے کے درمیان قبرستان جاتا ہوں تاکہ اپنے دوست کی قبر پر فاتحہ پڑھ سکوں، اس عمل سے بے حد سکون ملتا ہے۔

ان کا کہنا تھا کہ جب کسی کے ساتھ اتنی پرانی دوستی ہو اور وہ دنیا سے چلا جائے تو دکھ بہت زیادہ ہوتا ہے، دوست کی تصویر بھی ان کے کمرے میں موجود ہے۔

ساحر لودھی نے کہا کہ انہیں قبرستان سے کبھی خوف محسوس نہیں ہوا، بلکہ ان کے خیال میں اصل خوف زندہ انسانوں سے ہوتا ہے کیونکہ نقصان وہی پہنچاتے ہیں۔

اداکار کا کہنا تھا کہ انہیں بھوت یا جنات سے بھی کوئی ڈر نہیں لگتا کیونکہ انسان ایک دوسرے کو جتنی تکلیف دیتا ہے، اتنی شاید کوئی بھوت بھی نہ دے، جیسے مہنگائی، ٹیکس اور نظام کی خرابیاں ہی اصل بھوت ہیں۔

انہوں نے مزید کہا کہ وہ دن بھر مختلف کاموں میں مصروف رہتے ہیں، اسی لیے قبرستان جانے کا وقت انہیں صرف رات کو ہی ملتا ہے۔