اقرا کنول بڑی مشکل میں پھنس گئیں

نیشنل سائبر کرائم انویسٹی گیشن ایجنسی نے معروف سوشل میڈیا انفلوئنسر اقرا کنول کو نوٹس جاری کردیا۔

  ذرائع کے مطابق نیشنل سائبر کرائم انویسٹی گیشن ایجنسی (این سی سی آئی اے) نے آن لائن جوا اور بیٹنگ ایپس کے فروغ کے معاملے میں معروف یوٹیوبرز اور سوشل میڈیا انفلوئنسرز کو نوٹسز جاری کر دیے ہیں۔ رجب بٹ، اقرا کنول اور محمد انس علی کو 9 ستمبر کو طلب کیا گیا ہے تاکہ اس حوالے سے تحقیقات کی جا سکیں۔

دوسری جانب معروف یوٹیوبر "ڈکی بھائی” کو غیر قانونی جوا ایپلیکیشنز کی پروموشن کے کیس میں گرفتار کیا گیا ہے۔ انہیں عدالت میں پیش کیا گیا جہاں ان کے جسمانی ریمانڈ میں پانچویں بار توسیع کر دی گئی۔

 ڈکی بھائی پر الزام ہے کہ انہوں نے اپنے یوٹیوب چینل کے ذریعے غیر قانونی جوا ایپس کی تشہیر کی، جس پر 17 اگست کی نصف شب این سی سی آئی اے لاہور نے ریاست کی مدعیت میں مقدمہ درج کیا۔

مقدمے میں الیکٹرانک کرائمز ایکٹ 2016 کی دفعات 13 (الیکٹرانک جعلسازی)، 14 (الیکٹرانک فراڈ)، 25 (اسپیم)، 26 (اسپوفنگ) کے علاوہ پاکستان پینل کوڈ کی دفعات 294-بی اور 420 بھی شامل کی گئی ہیں۔