نازیہ ملک کا موٹروے پر سہیلیوں کے ساتھ خوف ناک واقعے سے گزرنے کا انکشاف

اداکارہ و ٹی وی میزبان نازیہ ملک نے اپنی سہیلیوں کے ساتھ موٹروے پر پیش آنے والے خوف ناک واقعے کی روداد سنادی۔

نازیہ ملک نے حال ہی نجی ٹی وی کے مارننگ شو میں شرکت کی، جہاں سہیلیوں کے ساتھ سیر سپاٹے کرنے کے تجربات بیان کیے۔

پروگرام کے دوران بات کرتے ہوئے بتایا کہ کچھ عرصہ قبل وہ اور ان کی سہیلیاں سوات گھومنے گئی تھیں، واپسی پر ان کے ساتھ خوف ناک واقعہ پیش آیا۔

ان کے مطابق ان کے ساتھ امریکا اور دوسرے بیرون ملک رہنے والی سہلیاں بھی تھیں اور مجموعی طور وہ 4 سہیلیاں ایک ساتھ سفر کر رہی تھیں۔

ان کا کہنا تھا کہ سوات سے واپسی پر انھیں شروع سے ہی کار ڈرائیور کی نیت پر شک ہوا، وہ پورے راستے کسی دوسرے شخص سے فون پر بات کرتے رہے اور پھر موٹروے کی ایک سنسان جگہ پر آکر گاڑی روک دی۔

نازیہ ملک نے بتایا کہ وہ فرنٹ سیٹ پر ڈرائیور کے ساتھ ہی تھیں، ڈرائیور نے گاڑی روک کر انہیں بتایا کہ گاڑی خراب ہوگئی ہے اور پھر وہ کسی شخص سے بات کرنے لگا۔

اداکارہ کے مطابق انھوں نے موٹروے کا جائزہ لیا، آس پاس کچھ نہ تھا، وہ خطرناک پوائنٹ پر رکے ہوئے تھے، جس پر انہوں نے حاضر دماغی سے کام لیا۔

انھوں نے بتایا کہ ڈرائیور نے چابی گاڑی میں ہی چھوڑ دی تھی، جس پر وہ ڈرائیونگ سیٹ پر بیٹھ گئیں اور ڈرائیور کو کہا کہ وہ بھلے یہیں کھڑے رہیں، وہ گاڑی چلا کر یہاں سے جا رہی ہیں۔

اداکارہ نے کہا کہ ان کی بات پر ڈرائیور پریشان ہوا اور انہوں نے گاڑی کو خود ہی ٹھیک کرکے چلانے کی حامی بھری اور پھر انہوں نے گاڑی کو تھوڑا سا چیک کرکے اسٹارٹ کیا اور گاڑی چل گئی۔

نازیہ ملک نے بتایا کہ ان کی حاضر دماغی نے انہیں بچالیا، ان کی تمام سہیلیاں پریشان ہوگئی تھیں، انہیں کچھ سمجھ نہیں آ رہا تھا۔

اداکارہ کے مطابق وہ خیریت سے موٹروے کی سنسان جگہ سے نکل آئیں اور ان کی حاضر دماغی کام آئی، باقی خواتین کو بھی اسی طرح حاضر دماغ رہنا چاہیے۔