فہد مصطفیٰ کی معروف شوبز شخصیت سے دوسری شادی کی خبریں؟ بڑی حقیقت سامنے آگئی

پاکستانی شوبز انڈسٹری کے معروف اداکار اور پروڈیوسر فہد مصطفیٰ کے حوالے سے سوشل میڈیا پر ان دنوں ایک نئی افواہ گردش کر رہی ہے کہ انہوں نے اپنی اہلیہ ثنا فہد کے بعد دوسری شادی کر لی ہے۔

فہد مصطفیٰ اپنی باصلاحیت اداکاری، پرکشش شخصیت اور کامیاب پروڈکشنز کے باعث عوام میں بے حد مقبول ہیں، ان کی ذاتی زندگی ہمیشہ ایک مثالی جوڑے کی حیثیت سے پیش کی جاتی رہی ہے۔ ان کی اور ثنا فہد کی محبت کی کہانی کالج کے زمانے سے شروع ہوئی، جو شادی میں بدلی اور اب دونوں کے دو بچے، بیٹی فاطمہ اور بیٹا موسیٰ بھی ہیں۔

تاہم حالیہ دنوں مختلف سوشل میڈیا پلیٹ فارمز پر گردش کرنے والی خبروں کے مطابق فہد مصطفیٰ نے دوسری شادی کر لی ہے، اور یہ شادی حنا امان نامی خاتون سے ہوئی ہے، جو خود بھی ایک معروف پروڈیوسر اور بیک سیٹ فلمز کی مالک ہیں۔

یہ خبر منظرِ عام پر آتے ہی سوشل میڈیا پر جہاں بعض صارفین نے اس خبر کو "کراچی شوبز فریٹرنیٹی کے اندر ایک کھلا راز” قرار دیا، وہیں کئی افراد نے بغیر کسی ثبوت کے اس طرح کی خبروں کو پھیلانے پر تنقید بھی کی۔ ایک صارف نے لکھا کہ "یہ صرف افواہیں ہیں، جب تک تصدیق نہ ہو، انہیں حقیقت نہیں ماننا چاہیے۔”

ابھی تک فہد مصطفیٰ یا ان کی اہلیہ ثنا فہد کی جانب سے ان خبروں کی نہ تو تصدیق کی گئی ہے اور نہ ہی تردید۔ اس خاموشی کے باعث چہ مگوئیاں مزید بڑھ گئی ہیں اور مداح سوشل میڈیا پر اس معاملے کی حقیقت جاننے کے لیے سرگرم ہیں۔

یاد رہے کہ فہد مصطفیٰ نے شوبز میں اپنے کیریئر کا آغاز ایک اداکار اور میزبان کے طور پر کیا اور جلد ہی اپنی پروڈکشن کمپنی کے تحت کئی کامیاب ڈرامے پیش کر کے پاکستان کے صفِ اول کے پروڈیوسرز میں جگہ بنائی۔ ان کی محنت، شفاف امیج اور عوامی انداز نے ہمیشہ انہیں مداحوں کا پسندیدہ رکھا ہے۔