مشہور گلوکار کنسرٹ کے دوران دل کا دورہ پڑنے سے انتقال کرگئے

ایران میں مشہور گلوکار و اداکار امید جہاں دل کا دورہ پڑنے کے باعث انتقال کر گئے ان کی عمر 43 سال تھی۔

امید جہاں نے جنوبی ایران میں لوک موسیقی کو پاپ رنگ دینے میں منفرد اعزاز حاصل کیا وہ ایران کے شہر بم میں ایک فیسٹیول کے دوران اسٹیج پر پرفارم کر رہے تھے کہ اچانک دل کا دورہ پڑا اور وہ گر گئے۔

واقعے کے وقت ایمرجنسی ٹیم نے انھیں فوری طور پر اسپتال منتقل کیا، جہاں ڈاکٹروں نے ان کی جان بچانے کی کوشش کی اور آئی سی یو منتقل کیا مگر وہ جانبر نہ ہو سکے۔

1982 میں ایران کے شہر آبادان میں پیدا ہونے والے امید جہاں نامور موسیقار محمود جہاں کے بیٹے تھے اور انہوں نے اپنے والد کے نقشِ قدم پر چلتے ہوئے موسیقی کو اپنا پیشہ بنایا۔

34 برس کی عمر میں انھوں نے اپنا پہلا باضابطہ البم ریلیز کیا جس نے انن کو موسیقی کی دنیا میں الگ پہچان دلائی۔

ان کے مقبول گانے اور جداگانہ انداز نے انھیں نہ صرف ایرانی مداحوں بلکہ دنیا بھر کے موسیقی کے شائقین میں مقبول بنایا۔ ان کی اچانک موت پر مداحوں اور فنکار برادری نے گہرے دکھ اور افسوس کا اظہار کیا ہے۔