معروف پاکستانی قوال انتقال کر گئے

فیصل آباد سے تعلق رکھنے والے معروف قوال استاد رشید احمد دل کا دورہ پڑنے کے باعث انتقال کر گئے۔

 مرحوم کو اچانک دل کا دورہ پڑا، جو جان لیوا ثابت ہوا۔ استاد رشید احمد نہ صرف فنِ قوالی کی دنیا میں ایک نمایاں مقام رکھتے تھے بلکہ وہ عالمی شہرت یافتہ قوال استاد نصرت فتح علی خان کے شاگرد اور موجودہ معروف گلوکار راحت فتح علی خان کے قریبی ساتھی بھی تھے۔

مرحوم استاد رشید احمد، استاد رشید رفیق کے بڑے بھائی تھے اور ان کا شمار ملک کے سینئر اور تجربہ کار قوالوں میں ہوتا تھا۔ ان کی نماز جنازہ آج دوپہر 2 بجے فیصل آباد کے علاقے 192 رب رسول نگر میں ادا کی جائے گی۔

استاد رشید احمد کے انتقال پر فن قوالی سے وابستہ حلقوں میں گہرے رنج و غم کا اظہار کیا جا رہا ہے، جبکہ ان کے مداحوں، اہلِ فن اور سیاسی و سماجی شخصیات کی جانب سے بھی تعزیت کا سلسلہ جاری ہے۔ ان کی فنی خدمات کو ہمیشہ یاد رکھا جائے گا۔