بھارت کے لیجنڈری اداکار کینسر کے باعث انتقال کرگئے

بھارتی ڈرامہ انڈسٹری کے معروف اداکار اور مہابھارت میں "کرن” کا یادگار کردار ادا کرنے والے پنکج دھیر بدھ کے روز انتقال کر گئے۔

 اداکار پنکج دھیر کی وفات کی خبر نے ان کے مداحوں اور ساتھی فنکاروں کو شدید صدمے میں ڈال دیا ہے۔ پنکج دھیر کا انتقال 15 اکتوبر کو صبح 11:30 بجے ہوا۔ تاہم، ان کی موت کی وجہ تاحال سامنے نہیں آ سکی ہے۔

ان کے قریبی دوست اور مہابھارت میں "ارجن” کا کردار ادا کرنے والے اداکار فیروز خان نے میڈیا سے بات کرتے ہوئے پنکج دھیر کی وفات کی تصدیق کی۔ فیروز خان نے کہا، "یہ حقیقت ہے کہ پنکج اب ہمارے درمیان نہیں رہے۔ میں نے صرف ایک ساتھی فنکار ہی نہیں بلکہ ایک بہترین دوست کھو دیا ہے۔ وہ بہت نفیس اور مخلص انسان تھے۔”

پنکج دھیر نے اپنی فنی زندگی کا آغاز تھیٹر سے کیا اور وقت کے ساتھ ٹی وی اور فلمی دنیا میں اپنی جگہ بنائی۔ انہیں سب سے زیادہ شہرت 1988 کے مشہور ٹی وی ڈرامے مہابھارت سے ملی، جس میں انہوں نے کرن کا کردار اس انداز سے ادا کیا کہ ناظرین آج بھی انہیں اسی کردار سے یاد کرتے ہیں۔ ان کا یہ کردار بہادری، وفاداری اور جذبات سے بھرپور تھا، جسے پنکج نے بے حد سادگی اور مہارت سے نبھایا۔

پنکج نے کئی فلموں اور ٹی وی شوز میں کام کیا، اور ہر جگہ اپنی موجودگی کا مضبوط تاثر چھوڑا۔ ان کے چاہنے والے انہیں ایک شریف النفس، عاجز اور مہربان انسان کے طور پر یاد کرتے ہیں۔

اداکاری کے میدان میں پنکج دھیر کا سفر ایک روشن مثال ہے۔ انہوں نے اپنی محنت اور لگن سے یہ ثابت کیا کہ سچے جذبے کے ساتھ کیا گیا کام ہمیشہ یاد رکھا جاتا ہے۔ ان کے اچانک جانے سے بھارتی انٹرٹینمنٹ انڈسٹری ایک سنجیدہ، باوقار اور باصلاحیت فنکار سے محروم ہو گئی ہے۔